សេ្តចប្រដាល់អាជីពសញ្ជាតិហ្វីលីពីន លោក Manny Pacquiao (ម៉ានី ប៉ាគីអាវ) គឺជាបុគ្គលដ៏មានឥទ្ធិពលមួយរូបក្នុងវិស័យប្រដាល់ Boxing ដែលមានតម្លៃខ្លួនកម្រិតថ្នាក់អន្តរជាតិ និងត្រូវបានគេចាត់ទុកថាជាកីឡាករដែលមានទ្រព្យសម្បត្តិច្រើនបំផុត ក្នុងចំណោម កីឡាករប្រដាល់ថ្នាក់ពិភពលោក៥រូប។
ពីយុវជនក្រីក្រគ្មានផ្ទះសម្បែង ក្លាយជាស្តេចប្រដាល់លំដាប់ពិភពលោក លោក Manny Pacquiao (ម៉ានី ប៉ាគីអាវ) អាចរកចំណូលបានជាមធ្យម ២៥លានដុល្លារ រាល់ពេលប្រកូតលើសង្វៀនម្តង។ ជាមួយនឹងទ្រព្យសម្បត្តិសុទ្ធសរុប ប្រមាណ២២០លានដុល្លារ គិតត្រឹមឆ្នាំ២០២៤នេះ។
តាមប្រភពពី Net Worth Celebrity បានឱ្យដឹងថា Manny Pacquiao ចំណូលនៃទ្រព្យសម្បត្តិមួយភាគធំរបស់លោក គឺបានមកពីការឡើងវាយប្រដាល់ ដោយលោកបានឡើងសង្វៀនលើកចុងក្រោយ មុនចូលនិវត្តន៍ កាលពីឆ្នាំ២០២១។
នៅក្នុងឆ្នាំ ២០១៥ ការឡើងសង្វៀនរបស់ Manny Pacquiao ចំនួន២៥ដង ធ្វើឱ្យលោកអាចទទួលបានប្រាក់ចំណូលចំនួន ១.២ ពាន់លានដុល្លារ ប៉ុន្តែលោកបានធ្វើការបរិច្ចាគទ្រព្យសម្បត្តិពាក់កណ្តាលរបស់ខ្លួនធ្វើសប្បុរសធម៌និងបង្កើត Manny Pacquiao Foundation ឡើង។
បើតាមទស្សនាវដ្ដី Forbes បានឱ្យដឹងថាក្នុងអាជីពជាអ្នកប្រដាល់ពិភពលោក Manny Pacquiao បានជាប់ជាអត្តពលិកដែលមានប្រាក់ខែខ្ពស់បំផុតទី២ នៅលើពិភពលោកក្នុងឆ្នាំ ២០១២ និង ២០១៥ ហើយជាអត្តពលិកដែលមានប្រាក់ខែខ្ពស់បំផុតទី៨ កាលពីឆ្នាំ ២០១០។ លើសពីនេះលោកក៏ជាអ្នកប្រដាល់តែមួយគត់ក្នុងប្រវត្តិសាស្ត្រប្រដាល់ ដែលក្លាយជាម្ចាស់ជើងឯកពិភពលោកលើផ្នែកចំនួន៨ និងឈ្នះការប្រកួតធំៗលំដាប់ពិភពលោកចំនួន១២ដង។
គួររំលឹកផងដែរថាលោក Manny Pacquiao បានចាប់ផ្តើមអាជីពជាអ្នកប្រដាល់នៅអាយុ១៥ឆ្នាំ ដោយលោកត្រូវបានគេចាត់ទុកថាជាអ្នកប្រដាល់ល្អបំផុតដែលនៅតែអាចឡើងសង្វៀនបានក្នុងអាយុ៤៣ឆ្នាំ។ ក្រៅពីអាជីពជាអ្នកប្រដាល់លោកក៏ធ្លាប់ជាអតីតសមាជិកព្រឹទ្ធសភា នៃសាធារណរដ្ឋហ្វីលីពីនកាលពីឆ្នាំ២០១៦ផងដែរ៕
អត្ថបទដោយ៖ ពីង ជូអេង
