គិតត្រឹមរយៈពេល ៨ខែដំបូងក្នុងឆ្នាំ ២០២៥ កម្ពុជាបាននាំចេញទំនិញទៅកាន់ទីផ្សារអន្តរជាតិមានតម្លៃលើស ២០ពាន់លានដុល្លារ កើនឡើងជិត ១៥% បើធៀបនឹងរយៈពេលដូចគ្នាកាលពីឆ្នាំ ២០២៤ ដែលមានទំហំប្រមាណជាង ១៧ពាន់លានដុល្លារ។ នេះបើតាមរបាយការណ៍ពី អគ្គនាយកដ្ឋាន និងរដ្ឋាករកម្ពុជា។

ក្នុងនោះផលិតផលសំខាន់ៗដែលជំរុញការនាំចេញរួមមាន សំលៀកបំពាក់ ស្បែកជើង វត្ថុធ្វើអំពីស្បែក និងផលិតផលឧស្សាហកម្មផ្សេងទៀត ខណៈទីផ្សារធំៗមានដូចជា សហរដ្ឋអាមេរិក គឺជាទីផ្សារចម្បងដែលកម្ពុជានាំចេញទំនិញច្រើនជាងគេមានទំហំរហូតដល់ ៨.៣ពាន់លានដុល្លារ កើនឡើង ២៣.២%, វៀតណាម មានទំហំ ២.៧ពាន់លានដុល្លារ កើនឡើង ១១.៥% និងចិនមានទំហំជាង ១ពាន់លានដុល្លារ រួមទាំងបណ្តាប្រទេសមួយចំនួនទៀតដូចជា ជប៉ុន អេស្ប៉ាញ ថៃ បារាំង បែលហ្ស៊ិក អ៊ីតាលី កូរ៉េខាងត្បូង ម៉ិកស៊ិក អូស្ត្រាលី ជា​ដើម។

យ៉ាងណាមិញ ជាមួយនឹងលទ្ធផលដ៏វិជ្ជមាននេះ កម្ពុជាអាចពង្រឹងសេដ្ឋកិច្ច និងបង្កើតឱកាសការងារច្រើនសម្រាប់ប្រជាពលរដ្ឋក្នុងស្រុកកាន់តែសម្បូរបែប។ មិនតែប៉ុណ្ណោះការកើនឡើងនៃការនាំចេញអាចផ្តល់ចំណូលបន្ថែម និងជំរុញការអភិវឌ្ឍប្រទេសឲ្យកាន់តែប្រសើរឡើង៕

អត្ថបទដោយ៖ កាន់ ដារ៉ា (ស្មេរពនេចរ) សៀវភៅ «ច្រវាក់ប្រាក់ខែ» (កសាងក្ដីស្រមៃនៅកន្លែងការងារ ចេះបង្កើតចំណូលច្រើនប្រភព) តម្លៃពិសេសត្រឹម ១២$ ប៉ុណ្ណោះ។ បញ្ជាទិញតាម    https://t.me/BusinessCambodiaBook