ការគ្រប់គ្រងបុគ្គលិកគឺជា តួនាទីលំបាកមួយព្រោះអ្នកដឹកនាំម្នាក់តម្រូវឱ្យកាច់ចង្កូតមនុស្សជាច្រើន។ យ៉ាងណាមិញក្នុងនាមជាមេមានតួនាទីជាអ្នកគ្រប់គ្រងបុគ្គលិក ផ្អែកតាមការសិក្សារបស់ទស្សនាវដ្តី Fobres បានឱ្យដឹងថារឿងធំៗ៣យ៉ាង អ្នកដឹកនាំមិនគួរធ្វើជាដាច់ខាត បើមិនចង់ឱ្យការគ្រប់គ្រងមិនរីកចម្រើន បុគ្គលិកមិនសប្បាយចិត្ត។
១. កែលម្អដោយប្រើមតិអវិជ្ជមាន៖ តែងតែផ្តល់មតិអវិជ្ជមាន ជេរប្រទេច ដាក់ទោស ផ្តោតលើចំណុចខ្សោយ ចមតិរិះគន់ខ្លាំងក្នុងអំឡុងពេលចង់កែតម្រូវនិងកែលម្អបុគ្គលិក គឺជារឿងមួយដែលថ្នាក់ដឹកនាំ មិនគួរធ្វើនោះឡើយ។ ព្រោះជាអ្នកគ្រប់គ្រងល្អ ម្នាក់ពួកគេតែងអាកប្បកិរិយាវិជ្ជមាន អារម្មណ៍កំប្លែងល្អ និងផ្តល់ការគាំទ្រដល់ក្រុមឱ្យមានតុល្យភាពរវាងមតិស្ថាបនា និងជាការផ្តល់យោបល់។
២. ជាមេបែប Micro៖ តែងតែមិនផ្តល់សិទ្ធិក្នុងការសម្រេចចិត្ត ដល់សមាជិកក្រុមតែងតែ ត្រួតពិនិត្យជាប្រចាំ តាមដានបុគ្គលិកជ្រុលលើសព្រំដែនការងារ រារាំងការច្នៃប្រឌិត ធ្វើឱ្យបុគ្គលិកមានអារម្មណ៍ថាពួកគេមិនមានសមត្ថភាពគួរឱ្យទុកចិត្ត។ ជាអ្នកគ្រប់គ្រងល្អម្នាក់ ពួកគេ តែងបង្កើតទំនុកចិត្តឱ្យគ្នា និងគោរពគ្នាទៅវិញទៅមក។
៣. ផ្តល់នូវព័ត៌មាននិងទំនាក់ទំនងមិនច្បាស់លាស់៖ តែងតែខ្សោយលើការប្រាស្រ័យទាក់ទង កង្វះតម្លាភាពអំពីការសម្រេចចិត្តជាមួយបុគ្គលិក ខ្វះព្រំដែននៃភាពស្និតស្នាល ដែលជាហេតុដែលអាចបង្កើតឱ្យភាពច្របូកច្របល់ និងការខកចិត្តជាច្រើនរវាងបុគ្គលិកនិងមេ ហើយមិនសូវចុះសម្រុងគ្នា។
ជាការពិតណាស់ ក្នុងនាមជាមេដឹកនាំត្រូវដឹងថា ក្នុងចំណោមបុគ្គលិកដែលខ្លួនគ្រប់គ្រង មានលក្ខណៈសម្បត្តិខុសគ្នាបែបណា លើជំនាញ ចរិត អាកប្បកិរិយា ចំណង់ ចំណូលចិត្តធ្វើការ ខុសគ្នាបែបណា ជាពិសេសត្រូវដឹងថាខ្លួនឯងត្រូវប្រតិបត្តិខ្លួនបែបណា ទើបអាចដឹកនាំក្រុមទៅកាន់ភាពរីកចម្រើនរួម៕
អត្ថបទដោយ៖ ពីង ជូអេង
