ដើម្បីសម្រួលដល់វិស័យដឹកជញ្ជូនផ្លូវទឹកនៅក្នុងប្រទេសកម្ពុជាឲ្យកាន់តែមានភាពងាយស្រួលជាងមុន រាជរដ្ឋាភិបាលបានដាក់ផែនការនៅក្នុងការសិក្សា និងស្ដារផ្លូវទឹកទន្លេសាបតភ្ជាប់រាជធានីភ្នំពេញ ខេត្ដកំពង់ឆ្នាំង ខេត្ដពោធិ៍សាត់ និងខេត្ដសៀមរាប។ ខណៈគម្រោងស្ដារ និងកែលម្អរផ្លូវទឹកនេះត្រូវបានបែងចែកជា ៣ កំណាត់។
យោងតាមផែនការមេគ្រប់ជ្រុងជ្រោយស្ដីពីប្រព័ន្ធដឹកជញ្ជូនអន្តរមធ្យោបាយ និងភស្ដុភារកម្មកម្ពុជា ២០២៣-២០៣៣ របស់រាជរដ្ឋាភិបាល គម្រោងស្ដារផ្លូវទឹកនេះរួមមាន៖
១. ការសិក្សារ និងផ្លូវទឹកទន្លេសាបពីភ្នំពេញ-កំពង់ឆ្នាំង
ការសិក្សារ និងការងារគូសប្លង់ស្ថាបត្យកម្ម និងវិស្វកម្មការស្ដារ និងកែលម្អរទឹកសម្រាប់សម្រួលដល់ការធ្វើនាវាចរដែលមានចំណុះ ២ ០០០ តោន ពីមាត់ច្រកទន្លេសាបនៅភ្នំពេញទៅខេត្ដកំពង់ឆ្នាំ។ ផ្លូវទឹកនេះមានប្រវែងសរុប ១២០ គីឡូម៉ែត្រ និងជម្រៅ ៣,៥ ម៉ែត្រ។ តាមការប៉ាន់ស្មានគម្រោងនេះត្រូវការទុនវិនិយោគសរុប ១០ លានដុល្លារ ដែលស្ថិតនៅក្នុងគម្រោងរយៈពេលខ្លី (២០២៣-២០២៧)។
២. ការសិក្សា និងស្ដារផ្លូវទឹកទន្លេសាបកំពង់ឆ្នាំង-ពោធិ៍សាត់
ការសិក្សា និងការងារគូសប្លង់ស្ថាបត្យកម្ម និងវិស្វកម្មការស្ដារ និងកែលម្អផ្លូវទឹកនេះគឺសម្រាប់សម្រួលការធ្វើនាវាចរដែលមានចំណុះ ៥០០ តោន ពីខេត្ដកំពង់ឆ្នាំងទៅខេត្ដពោធិ៍សាត់។ ចំពោះប្រវែងគឺមានសរុប ៥០ គីឡូម៉ែត្រ និងជម្រៅ ២,៧ ម៉ែត្រ។ តាមការប៉ាន់ស្មានគម្រោងនេះត្រូវការទុនវិនិយោគសរុប ១០០ លានដុល្លារ និងស្ថិតក្នុងគម្រោងរយៈពេលវែង (២០២៨-២០៣៣)។
៣.ការសិក្សា និងស្ដារផ្លូវទឹកទន្លេសាបពីពោធិ៍សាត់-សៀមរាប
ចំពោះគម្រោងនេះវិញ គឺសម្រាប់សម្រួលការធ្វើនាវាចរដែលមានចំណុះ ៥០០ តោនពីខេត្ដពោធិ៍សាត់ទៅខេត្ដសៀមរាប ដូចផ្លូវទឹកតភ្ជាប់ពីកំពង់ឆ្នាំទៅពោធិ៍សាត់ដែរ។ ប៉ុន្ដែសម្រាប់ការស្ដារផ្លូវទឹកនេះគឺមានប្រវែងសរុប ៩០ គីឡូម៉ែត្រ និងមានជម្រៅ ២,៧។ តាមការប៉ាន់ស្មានគម្រោវនេះត្រូវការទុវិនិយោគសរុប ១៣០ លានដុល្លា និងស្ថិតនៅក្នុងការអភិវឌ្ឍន៍រយៈពេលវែង (២០២៨-២០៣៣)៕