ចម្ការយ៉ាដាគឺជាចម្ការដំបូងគេដែលបានដាំដំណាំល្ម៉ើលើទឹកដីស្រុកសំពៅលូន ខេត្ដបាត់ដំបង។ ចម្ការនេះត្រូវបានបង្កើតឡើងដោយគូស្វាមីភរិយាវេជ្ជបណ្ឌិតមួយគូ គឺលោក វេជ្ជបណ្ឌិត សាន សុខន និងលោកស្រី វេជ្ជបណ្ឌិត គួច ចន្ទ័ដាលីស។ ដោយមានឈាមជ័រជាគ្រូពេទ្យ ទោះងាកមកធ្វើចម្ការក៏ដោយ ក៏លោក សាន សុខន នៅតែផ្ដោតសំខាន់ទៅលើសុខភាពជាចម្បង ហើយរូបលោកផ្ទាល់ជាអ្នកជំនាញបច្ចេកទេសតែម្ដង។ ល្ម៉ើដែលដាំដុះក្នុងចម្ការយ៉ាដា ត្រូវបានដាំដោយយកចិត្ដទុកដាក់ គិតតាំងពីការជ្រើសរើសពូជ (ពូជជាលិកាវប្បកម្ម) បច្ចេកទេសដាំ ថែទាំ និងប្រមូលផល ឲ្យស្របតាមគោលការណ៍បច្ចេកទេសស្ដង់ដាទាំងក្នុងនិងក្រៅប្រទេស។
អស់រយៈពេល ៥ឆ្នាំ គិតតាំងពីពេលដាំរហូតដល់ប្រមូលផលលើកទី ៣នេះ ចម្ការយ៉ាដាបានទទួលវិញ្ញាបនបត្រនៃការអនុវត្ដកសិកម្មល្អ (CamGAP)ពីអគ្គនាយកដ្ឋានកសិកម្ម ព្រោះម្ចាស់ចម្ការបានអនុវត្ដន៍និងគោរពតាមគោលការណ៍អនាម័យស្របតាមការកំណត់របស់ក្រសួងកសិកម្ម។
លោកវេជ្ជបណ្ឌិត សាន សុខន បានប្រាប់ក្រុមការងារ Business Cambodia ឲ្យដឹងថាទម្រាំតែទទួលបាន វិញ្ញាបនបត្រនៃការអនុវត្ដកសិកម្មល្អ (CamGAP)ពីអគ្គនាយកដ្ឋានកសិកម្ម មិនមែនជារឿងងាយស្រួលឡើយ គឺត្រូវឆ្លងកាត់ដំណាក់កាលត្រួតពិនិត្យគុណភាពល្ម៉ើពីសំណាក់មន្រ្ដីជំនាញនៃក្រសួងកសិកម្មជាមុនសិន។ ប្រសិនបើយើងចេះតែដាំដោយខ្វះបច្ចេកទេស និងមិនគោរពតាមគោលការណ៍របស់ក្រសួង ពិតណាស់ថា ចម្ការយ៉ាដា នឹងមិនទទួលបានវិញ្ញាបនបត្រមួយនេះឡើយ។
ម្ចាស់ចម្ការយ៉ាដាខាងលើបានបន្ដមានប្រសាសន៍ទៀតថា ដំណាំល្ម៉ើក្នុងចម្ការយ៉ាដា ដាំដុះដោយរូបលោកផ្ទាល់ដៃ បូកផ្សំជាមួយនឹងជំនាញវិជ្ជាជីវៈពាក់ព័ន្ធនឹងបច្ចេកទេសដាំ ដែលលោកបានទៅរៀននៅប្រទេសថៃផងនោះ ជាលទ្ធផល ល្ម៉ើដែលដាំលើទឹកដីស្រុកសំពៅលូន ត្រូវបានទទួលការស្ញើចសរសេរពីគុណភាព និងរសជាតិ ពីសំណាក់មន្រ្ដីជំនាញក្រសួងកសិកម្មទៀតផង។ ទន្ទឹមនឹងនោះដែរ ល្ម៉ើក្នុងចម្ការយ៉ាដា ត្រូវបានសហការណ៍ដាក់លក់ក្នុងម៉ាត និងផ្សារទំនើបធំៗក្នុងប្រទេស ហើយចម្ការយ៉ាដាក៏ដៃគូរអាជីវកម្មដ៏ល្អ របស់ម៉ាក្រូខេមបូឌាផងដែរ។ អ្វីដែលពិសេសជាងនេះទៀតនោះ ផ្លែល្ម៉ើក្នុងចម្ការ ក៏ត្រូវបានក្រុមហ៊ុនមួយចំនួន ចង់សហការនាំចេញទៅកាន់ទីផ្សារអន្ដរជាតិ ដោយហេតុថាល្ម៉ើនេះត្រូវប៉ាន់ទាំងរសជាតិនិងទំហំ។
គួរបញ្ជាក់ផងដែរថា ក្នុងចម្ការយ៉ាដាមិនត្រឹមតែមានល្ម៉ើដែលមានរសជាតិឆ្ញាញ់ និងមានគុណភាពខ្ពស់ប៉ុណ្ណោះទេ នៅថ្ងៃទី ១១ ខែកក្កដា ខាងមុខនេះម្ចាស់ចម្ការនឹងការដាក់លក់ល្ម៉ើក្នុងចម្ការថែមទៀតផង។ បងប្អូនមិនត្រឹមតែអាចភ្លក់ ឬទិញល្ម៉ើប៉ុណ្ណោះទេ គឺអាចថតរូបលេងកំសាន្ដជាមួយទេសភាពដ៏ស្រស់ត្រកាលនៃចម្ការល្ម៉ើជាប់ជើងភ្នំ។ សម្រាប់បងប្អូនដែលនិយមដើរលេងផ្សងព្រេង ក៏អាចទៅបោះតង់ ក្នុងចម្ការល្ម៉ើបានដែរ។
លោក សាន សុខន “ល្ម៉ើខ្មែរដាំដុះលើទឹកដីស្រុកសំពៅលូន មានគុណភាពល្អជាងល្ម៉ើបរទេស ទាំងរសជាតិ និងទំហំ ឈ្មួញឃើញទទួលទិញដៃពីរ ទាំងនេះអាចបញ្ជាក់ថាកសិករក៏អាចបង្កើតផលិតផលកសិកម្មត្រូវតាមស្ដង់ដាជាតិនិងអន្ដរជាតិបានដែរ។ ឲ្យតែយើងដាំដុះដំណាំប្រកបដោយភាពស្មោះត្រង់ ផ្ដោតសំខាន់លើសុខភាពអ្នកបរិភាគជាចម្បង នោះមិនខ្វះទេទីផ្សារចាំទទួលទិញ ហើយជាជំហានបន្ទាប់យើងក៏អាចនាំចេញនូវផលិតផលខ្មែរទៅឆាកអន្ដរជាតិបានដែរ”។
សម្រាប់បងប្អូនដែលមានបំណងចង់សហការណ៍ជាដៃគូជាមួយចម្ការយ៉ាដា ឬចង់ទាក់ទិញល្ម៉ើសំពៅលូន អាចទាក់ទងតាមលេខទូរស័ព្ទ 060 356 289 ឬតាមរយៈហ្វេសប៊ុកផេក https://www.facebook.com/Chamkayada
