នាពេលខាងមុខនេះរោងចក្រកែច្នៃឈើគ្រប់ប្រភេទ ដ៏ធំមួយ ដែលតម្លៃជាង ៤៤ លានដុល្លារ នឹងបង្ហាញវត្ដមាននៅក្នុងខេត្ដកំពង់ចាម ខណៈបច្ចុប្បន្នគម្រោងនេះត្រូវបានក្រុមប្រឹក្សាអភិវឌ្ឍន៍កម្ពុជា ហៅកាត់ថា CDC ទើបបានអនុម័តនាពេលថ្មីៗកន្លងទៅនេះ។

យោងតាមការចុះផ្សាយពី CDC បានឲ្យដឹងថា តាមសំណើសុំវិនិយោគគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគ ជូនដល់ក្រុមហ៊ុន “GREEN VISION RISING CO., LTD” គម្រោងបង្កើតរោងចក្រកែច្នៃឈើដាំគ្រប់ប្រភេទ ដែលមានដូចជា Veneer, Wood Pallet, Plywood...។

តាមការបញ្ជាក់បន្ដពី CDC រោងចក្រដ៏ធំនេះមានទីតាំងវិនិយោគស្ថិតនៅភូមិស្រឡៅនិងភូមិអណ្តូងច្រុះ ឃុំអំពិល ស្រុកកំពង់សៀម ខេត្តកំពង់ចាម ក្នុងទុនវិនិយោគប្រមាណ ៤៤,២លានដុល្លារអាម៉េរិក និងអាចបង្កើតការងារបានចំនួន ១.៤១៤កន្លែង៕

អត្ថបទ៖ កឹម ប៊ុនធឿន