ធនាគារ វីង (ខេមបូឌា) ម.ក មានមោទនភាពក្រៃលែង ដោយទទួលបានពានរង្វាន់  “សហគ្រាសមួយ ជាសហគមន៍សុខសាន្តមួយ” ប្រភេទមាស ដែលជាការទទួលស្គាល់ថ្នាក់ជាតិលើកិច្ចខិតខំប្រឹងប្រែងឥតងាករេរបស់ធនាគារ វីង ក្នុងការលើកកម្ពស់សុវត្ថិភាព និងសុខដុមនីយកម្មនៅកន្លែងធ្វើការសម្រាប់បុគ្គលិកគ្រប់រូប និងជាការបោះជំហានដ៏អស្ចារ្យមួយពីពានរង្វាន់កម្រិតប្រាក់កាលពីឆ្នាំ ២០២៥ កន្លងទៅ។

ពានរង្វាន់កម្រិតមាសនេះ ត្រូវបានផ្តល់កិត្តិយសដ៏ខ្ពង់ខ្ពស់ប្រគល់ជូនដោយផ្ទាល់ពីសំណាក់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងពិធីអបអរសាទរខួបអនុស្សាវរីយ៍លើកទី១៤០ នៃទិវាពលកម្មអន្តរជាតិ ដែលរៀបចំឡើងដោយក្រសួងការងារ និងបណ្តុះបណ្តាលវិជ្ជាជីវៈ នៅមជ្ឈមណ្ឌលសន្និបាត និងពិព័រណ៍កោះពេជ្រ។

ការទទួលបានពានរង្វាន់កម្រិតមាសនេះ បានឆ្លុះបញ្ចាំងពីវឌ្ឍនភាពជាបន្តបន្ទាប់របស់ធនាគារ វីង ក្នុងការកសាងវប្បធម៌ការងារដែលតែងតែយកចិត្តទុកដាក់ទៅលើសុវត្ថិភាព បរិយាបន្ន និងសុខុមាលភាពបុគ្គលិក។ និងក៏ជាសក្ខីភាពមួយបង្ហាញថា ការផ្តល់ការងារប្រកបដោយការទទួលខុសត្រូវ និងការរីកចម្រើននៃអាជីវកម្ម គឺអាចដើរទៅមុខទន្ទឹមគ្នាបានយ៉ាងល្អប្រសើរ។

លោកបណ្ឌិត ឌីមីត្រូ ខូលេកកូ អគ្គនាយកធនាគារ វីង បានលើកឡើងថា៖  “នៅពេលដែលបុគ្គលិកមានអារម្មណ៍ថាសុវត្ថិភាព ទទួលបានការគោរព និងការយកចិត្តទុកដាក់ ពួកគេនឹងមាន មានថាមពលបញ្ចេញសមត្ថភាពធ្វើការងារបានល្អបំផុត ហើយផលវិជ្ជមាននេះ នឹងរីកសាយភាយលើសពីកន្លែងធ្វើការទៅទៀត។”

លោកបណ្ឌិតបានបន្ថែមថា៖  “យើងមានកិត្តិយសណាស់ដែលទទួលបានពានរង្វាន់កម្រិតមាសនេះ និងសូមថ្លែងអំណរគុណយ៉ាងជ្រាលជ្រៅចំពោះក្រសួងការងារ និងបណ្តុះបណ្តាលវិជ្ជាជីវៈ សម្រាប់ដែលដាក់ឱ្យដំណើរការនូវគំនិតផ្តួចផ្តើមនេះឡើង ដែលជួយលើកកម្ពស់ការផ្តល់ការងារប្រកបដោយការទទួលខុសត្រូវ និងការរីកចម្រើនរួមគ្នានៅក្នុងប្រទេសកម្ពុជា។”

យុទ្ធនាការ “សហគ្រាសមួយ ជាសហគមន៍សុខសាន្តមួយ” ផ្តួចផ្តើមឡើងដោយក្រសួងការងារ និងបណ្តុះបណ្តាលវិជ្ជាជីវៈ ដើម្បីវាយតម្លៃកន្លែងធ្វើការនៅទូទាំងប្រទេសកម្ពុជា ផ្អែកលើលក្ខណៈវិនិច្ឆ័យអនុលោមភាពចំនួន ៨ ចំណុច រួមមាន៖ ការគោរពលក្ខខណ្ឌការងារ សុវត្ថិភាពនិងសុខភាពការងារ ការអនុលោមតាមរបបបេឡាជាតិរបបសន្តិសុខសង្គម (ប.ស.ស) ទំនាក់ទំនងវិជ្ជាជីវៈល្អ ការលើកកម្ពស់ផលិតភាព ការទទួលខុសត្រូវសង្គម ព្រមទាំងបរិយាបន្នក្នុងការផ្តល់ឱកាសការងារដល់យុវជន និងជនពិការជាដើម។

ការបន្តរក្សាបាននូវការទទួលស្គាល់ថ្នាក់ជាតិរយៈពេល២ឆ្នាំជាប់ៗគ្នានេះ បានគូសបញ្ជាក់ពីការបន្តអភិវឌ្ឍខ្លួនឥតឈប់ឈររបស់ធនាគារ វីង និងការវិនិយោគរយៈពេលវែងលើធនធានមនុស្សរបស់ខ្លួន។

កាលពីឆ្នាំ ២០២៥ ធនាគារ វីង បានបង្កើនចំនួនបុគ្គលិករហូតដល់ប្រមាណ ៨៧% ធៀបនឹងឆ្នាំ២០២៤ ដែលជាការឆ្លុះបញ្ចាំងពីការរីកចម្រើននៃអាជីវកម្មដ៏រឹងមាំ គួបផ្សំនឹងការបន្តយកចិត្តទុកដាក់ខ្ពស់លើការអភិវឌ្ឍសមត្ថភាពបុគ្គលិក។ ទន្ទឹមនឹងនេះ ធនាគារ វីង ក៏បានបន្តបណ្ដុះបណ្ដាលយុវជនដែលមានសក្ដានុពល តាមរយៈគំនិតផ្ដួចផ្ដើមនានា ដូចជា  “កម្មវិធីអភិវឌ្ឍន៍បុគ្គលិកកម្មសិក្សា” ដែលបានជួយជ្រោមជ្រែងយុវជនកម្ពុជាដែលមានសមត្ថភាព ប៉ុន្តែខ្វះលទ្ធភាព ជាង ១៥០ នាក់ អាចប្រែក្លាយពីចំណេះនៅក្នុងថ្នាក់រៀន រហូតទទួលបានអាជីពការងារពេញម៉ោង។

សំណុំតម្លៃការងាររបស់ធនាគារ វីង ផ្តោតលើសសរស្តម្ភបួន រួមមាន៖ “ការយកចិត្តទុកដាក់”  “ការអភិវឌ្ឍន៍” ”ការបង្កើតផលវិជ្ជមាន”  និង  “ការផ្តល់រង្វាន់លើកទឹកចិត្ត” ។ សសរស្តម្ភទាំង៤នេះស្របជាមួយនឹងគុណតម្លៃស្នូលទាំង៦ របស់ធនាគារ វីង ៖ “ជ័យជម្នះ”, “ច្នៃប្រឌិត”, “បង្រៀន ឬណែនាំ”, “រីកចម្រើន”, “ល្អឥតខ្ចោះ” និង “ការគោរព” ដែលគុណតម្លៃទាំងនេះ គឺជាត្រីវិស័យក្នុងការតម្រង់ទិសដៅរបស់ធនាគារ វីង សំដៅគាំទ្រ ផ្តល់តម្លៃ និងជំរុញលើកទឹកចិត្តដល់បុគ្គលិកគ្រប់ៗរូប។

ក្រៅពីការយកចិត្តទុកដាក់លើវប្បធម៌ការងារផ្ទៃក្នុង ធនាគារ វីង ក៏បានជំរុញយ៉ាងសកម្មនូវសមធម៌ និងបរិយាបន្ននៅក្នុងកន្លែងធ្វើការផងដែរ។ ជាក់ស្តែង តាមរយៈកិច្ចសហការជាមួយអង្គការ Good Return ធនាគារ វីងបានរៀបចំ  “ផែនការសកម្មភាពយេនឌ័រ” និងដាក់ឱ្យអនុវត្តនូវគោលនយោបាយស្តីពីការការពារកុមារ ការទប់ស្កាត់ការកេងប្រវ័ញ្ច ការរំលោភបំពាន និងការបៀតបៀនផ្លូវភេទ រួមជាមួយនឹងការបណ្តុះបណ្តាលបុគ្គលិកអំពីការអនុវត្តបរិយាបន្នយេនឌ័រ ដើម្បីពង្រឹងវប្បធម៌នៃការគោរពគ្នាទៅវិញទៅមក។

លើសពីនេះទៅទៀត ធនាគារ វីង ក៏បានយកចិត្តទុកដាក់លើសុខុមាលភាពបុគ្គលិក តាមរយៈកម្មវិធីថែទាំសុខភាពជាច្រើន ការរៀបចំឱ្យមានកន្លែងហាត់ប្រាណនៅក្នុងអគារធនាគារផ្ទាល់ ការប្រឹក្សាយោបល់លើសុខភាពផ្លូវចិត្ត និងការបង្កើតសកម្មភាពបង្កើនទំនាក់ទំនងនានា ដើម្បីលើកកម្ពស់សុខភាពផ្លូវកាយ និងផ្លូវចិត្ត។ កិច្ចខិតខំប្រឹងប្រែងទាំងនេះ បានរួមចំណែកបណ្ដុះនូវវប្បធម៌នៃការយកចិត្តទុកដាក់ និងការទទួលខុសត្រូវរួមគ្នាឱ្យកាន់តែរឹងមាំទៀតផង។