សាលាបឋមសិក្សាវត្ដបូព៌ ដែលជាសាលារៀនមួយមានសណ្ដាប់ធ្នាប់ និងវិន័យល្អ ស្ថិតក្នុងកម្រិតស្ដង់ដារខ្ពស់នៅក្នុងប្រទេសកម្ពុជា នឹងត្រូវផ្លាស់ប្ដូរឈ្មោះថ្មីមកជា «សាលាបឋមសិក្សាវត្ដរាជបូណ៌» វិញ។ នេះបើយោងតាមសេចក្ដីប្រកាសរបស់ក្រសួងអប់រំ យុវជន និងកីឡា ចុះថ្ងៃទី២០ ខែឧសភា ឆ្នាំ២០២៤។
តាមការបញ្ជាក់នៅក្នុងសេចក្ដីប្រកាសរបស់ក្រសួងអប់រំ ការប្ដូរឈ្មោះថ្មីមកជាសាលាបឋមសិក្សវត្ដរាជបូណ៌នេះ នឹងត្រូវចាប់ផ្ដើមពីឆ្នាំសិក្សា ២០២៣-២០២៤ នេះតទៅ។
សូមជម្រាបថា សាលាបឋមសិក្សាវត្ដបូព៌ ឬវត្ដរាជបូណ៌ មានទីតាំងស្ថិតនៅក្នុងភូមិវត្ដបូព៌ សង្កាត់សាលាកំរើក ក្រុងសៀមរាប ខេត្ដសៀមរាប។ សាលាមួយនេះត្រូវបានចាត់ទុកជាសាលាគំរូដោយបានសាងកេរ្តិ៍ឈ្មោះសម្រាប់សិស្សានុសិស្សដែលមានសុជីវធម៌ល្អ បរិយាកាសរីករាយ និងគ្រូដែលមានការយកចិត្តទុកដាក់ខ្ពស់៕