ប្រិយមិត្តដែលនិយមតាមដានភាពយន្តចិនខ្លីៗលើបណ្តេញសង្គម បកប្រែជាភាសាខ្មែរប្រាកដជាស្គាល់ហើយលោកប្រធាន លី តុង តែងនិយមដើរតួអង្គជាម្ចាស់ក្រុមហ៊ុនជំនួញពាន់លានដុល្លារ និងជាបុរសចិត្តធម៌សំបូរស្នេហ៍ជាក់ជាមិនខាន។ ប៉ុន្តែបើក្រឡេកមើលជីវិតក្រៅឆាកតារាសម្តែងរូបនេះវិញក៏មានសមត្ថភាពមិនធម្មតាដែរ ហើយថែមទាំងជាសេដ្ឋីលាក់មុខទៀត។
បុរសចិនដីគោកវ័យ ៣៤ឆ្នាំលោក Wang Daotie (王道铁) បានកើតនៅខេត្ត Sichuan ប្រទេសចិន លោកគឺជាតារាសម្តែងដែលបានបញ្ចប់ការសិក្សាពី Central Academy of Drama និងបានឈានជើងចូលសិល្បៈដំបូងក្នុងឆ្នាំ ២០១១ ជាមួយខែ្សភាពយន្តដំបូងគឺ "Today and Tomorrow " ។ ជាមួយនឹងខ្សែភាពយន្តដំបូងនេះលោកក៏បានល្បីល្បាញនឹងក្លាយជាតារាឆ្នើម ទទួលពានរង្វាន់តារាសម្តែងល្អបំផុតនៅឯសន្និសីទសរសើរសមាគមអ្នកដឹកនាំភាពយន្តចិនលើកទី២៦ ក្នុងឆ្នាំ២០១៣។
តាមរយៈបទពិសោធន៍និងបញ្ចប់ការសិក្សាពីសាលាភាពយន្តធំលំដាប់ទី២នៅអាស៊ី លោក Wang Daotie មានសមត្ថភាពពិសេស៣ ក្នុងវិស័យសិល្បៈ ដោយលោកមិនត្រឹមតែជាតួសម្តែងប៉ុណ្ណោះទេ លោកក៏ជាអ្នកនិពន្ធសាច់រឿង សរសេរប៉ារ៉ូលភាពយន្ត ជាផលិតករដឹកនាំរឿង និងជាតួអង្គសម្តែងក្បាច់គុនក្នុងរឿងភាគបុរាណចិនថែមទៀតផង។
ចាយពេលជាង១០ឆ្នាំលើវិថីនេះលោក Wang Daotie បានដឹកនាំសម្តែងខែ្សភាពយន្តធំៗចំនួន២រឿង ជាតួអង្គសម្តែងចំនួន១១រឿង, និងបង្ហាញខ្លួនលើរឿងភាគទូរទស្សន៍ចំនួន៩។ បើតាមប្រភពពី Networth company បានឱ្យដឹងថាបុរសប្រជាប្រិយកម្ពស់១.៧៨រូបនេះមានទ្រព្យសម្បត្តិប្រមាណជាង១លានដុល្លារ ដែលទទួលបានពីប្រាក់ចំណូលក្នុងឧស្សាហកម្មភាពយន្ត និងកម្សាន្ត។
គួរជម្រាបផងដែរថាក្រៅអំពីខ្សែភាពយន្តទាំងនេះលោក Wang Daotie ដែលប្រិយមិត្តមួយភាគធំស្គាល់ថាជាលោកប្រធាន លីតុង ក៏ជាតារាអ៊ីនធើណេតដ៏ល្បីនៅលើ Wiebo របស់ប្រទេសចិនផងដែរ។ ខណៈភាពយន្តភាគរបស់លោកមួយចំនួនក៏ត្រូវបានល្បីល្បាញនៅលើបណ្តេញសង្គមខ្មែរថែមទៀត ដោយភាពយន្តទាំងនោះអាចល្បីល្បាញសុះសាយទាក់ចិត្តអ្នកប្រើអ៊ីនធើណេតនៅកម្ពុជា ដោយរំលេចតាមនូវមេរៀនធំៗចំនួន៣គឺ៖ ទី១. ភាពស្មោះត្រង់របស់ដៃគូ, នយោបាយក្នុងការិយាល័យ, និងភាពឆ្លាតវៃរបស់ស្រ្តីក្នុងការដោះស្រាយបញ្ហាផងដែរ៕
អត្ថបទដោយ៖ ពីង ជូអេង
