រដ្ឋាភិបាលវៀតណាមគ្រោងនឹងបន្តកាត់បន្ថយអត្រាការយកពន្ធលើតម្លៃបន្ថែម (VAT) រហូតដល់ខែ មិថុនា ឆ្នាំ ២០២៤ ដើម្បីជម្រុញការប្រើប្រាស់ផលិតផលក្នុងស្រុកបន្ថែមក្នុងអំឡុងពេលដែលសេដ្ឋកិច្ចកំពុងពិបាក។ នេះបើយោងតាមការចុះផ្សាយរបស់សារព័ត៌មានក្រៅស្រុកមួយឈ្មោះថា Asia Nikkei ។
ប្រភពដដែលខាងលើនេះបានឱ្យដឹងថា ការកាត់បន្ថយពន្ធលើតម្លៃបន្ថែម (VAT) នេះត្រូវបានអនុម័តម្តងរួចមកហើយកាលពីខែ កក្កដា ឆ្នាំ ២០២៣ កន្លងទៅហើយត្រូវផុតកំណត់នៅត្រឹមចុងឆ្នាំនេះ ប៉ុន្តែដោយមើលឃើញពិផលលំបាកនៅតែបន្តមាន រដ្ឋាភិបាលវៀតណាមក៏សម្រេចបន្តការលើកលែងនេះបន្ថែមទៀតរហូតដល់ឆ្នាំក្រោយ ពី ១០% មកត្រឹម ៨% វិញ។
បើតាមការលើកឡើងរបស់រដ្ឋាភិបាលវៀតណាមបាននិយាយនៅក្នុងសេចក្តីថ្លែងការណ៍មួយថា “អត្រា ៨% អាចអនុវត្តបានជាទូទៅគ្រប់សេវាកម្មនិងផលិតផលផ្សេងៗ លើលែងតែចំពោះសេវាកម្ម ធនាគារ ហិរញ្ញវត្ថុ ទូរគមនាគមន៍ និងអចលនទ្រព្យ ប៉ុន្តែដែលនៅរក្សាការយកពន្ធលើតម្លៃបន្ថែមនេះ ១០% ដដែល” ។ ចំពោះការកាត់បន្ថយអត្រាពន្ធលើតម្លៃបន្ថែម (VAT) នេះបានបន្ថយចំណូលថវិការបស់រដ្ឋាភិបាលចំនួន ២៥ពាន់ពាន់លានដុង (១.០២ ពាន់លានដុល្លារ)៕
