រាជធានីភ្នំពេញ៖ ព្រឹត្តិការណ៍កីឡាជាតិ លើកទី៥ និងកីឡាជាតិជនពិការ លើកទី៣ ឆ្នាំ២០២៦ ដែលជាមហាព្រឹត្តិការណ៍កីឡាថ្នាក់ជាតិដ៏សំខាន់បំផុតប្រចាំឆ្នាំ បានបិទបញ្ចប់ជាស្ថាពរប្រកបដោយជោគជ័យ និងមោទនភាពក្រៃលែង ក្រោមការចូលរួមសហការឧបត្ថម្ភផ្តាច់មុខពី ក្រុមហ៊ុន វឌ្ឍនៈ ដែលតែងតែបង្ហាញពីឆន្ទៈ និងការប្តេជ្ញាចិត្តខ្ពស់ក្នុងការរួមចំណែកអភិវឌ្ឍ និងលើកស្ទួយវិស័យកីឡានៅព្រះរាជាណាចក្រកម្ពុជាឱ្យកាន់តែរីកចម្រើន។

នេះគឺជាលើកទី៣ ហើយ ដែលក្រុមហ៊ុន វឌ្ឍនៈ បានចូលរួមឧបត្ថម្ភផ្តាច់មុខក្នុងមហាព្រឹត្តិការណ៍កីឡាជាតិ និងកីឡាជាតិជនពិការ តាមរយៈការសហការជាមួយរាជរដ្ឋាភិបាល និងគណៈកម្មាធិការជាតិអូឡាំពិកកម្ពុជា។ កិច្ចសហការដ៏មានតម្លៃនេះ បានបង្កើតជាវេទិកា និងឱកាសដ៏ទូលំទូលាយសម្រាប់អត្តពលិកជាតិ និងអត្តពលិកជនពិការមកពីគ្រប់រាជធានី-ខេត្ត ទូទាំងប្រទេស បានបញ្ចេញអស់នូវសមត្ថភាព ទេពកោសល្យ និងស្មារតីប្រកួតប្រជែងប្រកបដោយភាពថ្លៃថ្នូរ ព្រមទាំងជាការជំរុញការសម្រិតសម្រាំងធនធានអត្តពលិកឆ្នើមៗ ដើម្បីត្រៀមលក្ខណៈតំណាងឱ្យកម្ពុជាចូលរួមប្រកួតប្រជែងដណ្តើមមេដាយលើឆាកអន្តរជាតិនាពេលអនាគត។

តំណាងក្រុមហ៊ុន វឌ្ឍនៈ បានលើកឡើងថា៖ «ក្រុមហ៊ុន វឌ្ឍនៈ មានមោទនភាពយ៉ាងក្រៃលែងដែលបានបន្តចូលរួមចំណែកជាម្ចាស់ឧបត្ថម្ភផ្តាច់មុខក្នុងព្រឹត្តិការណ៍កីឡាជាតិ លើកទី៥ និងកីឡាជាតិជនពិការ លើកទី៣ ឆ្នាំ២០២៦ នេះ។ សម្រាប់ក្រុមហ៊ុន វឌ្ឍនៈ ការគាំទ្រវិស័យកីឡាមិនមែនត្រឹមតែជាការឧបត្ថម្ភដល់ការប្រកួតប៉ុណ្ណោះទេ ប៉ុន្តែគឺជាការវិនិយោគដ៏មានតម្លៃបំផុតលើសុខុមាលភាព ស្មារតីតស៊ូ និងសក្តានុពលរបស់យុវជនកម្ពុជា។ ក្រុមហ៊ុន វឌ្ឍនៈ កោតសរសើរចំពោះភាពក្លាហាន និងការខិតខំប្រឹងប្រែងរបស់អត្តពលិកគ្រប់រូប ហើយក្រុមហ៊ុន វឌ្ឍនៈ នឹងនៅតែបន្តឈរនៅពីក្រោយគាំទ្រគ្រប់ជំហាន ដើម្បីជំរុញឱ្យទង់ជាតិកម្ពុជាកាន់តែបក់រវិចយ៉ាងត្រដែតលើឆាកអន្តរជាតិ»។

.
ទន្ទឹមនឹងមហាព្រឹត្តិការណ៍ថ្នាក់ជាតិនេះ ក្រុមហ៊ុន វឌ្ឍនៈ ក៏តែងតែដើរតួនាទីយ៉ាងសកម្មក្នុងការគាំទ្រដល់ប្រភេទកីឡាជាច្រើនទៀត រួមមាន កីឡាបាល់ទាត់ កីឡាប្រដាល់គុនខ្មែរ កីឡាតេក្វាន់ដូ និងកីឡារត់ប្រណាំងជាដើម ក្នុងគោលបំណងលើកទឹកចិត្តដល់ប្រជាពលរដ្ឋ ជាពិសេសស្រទាប់យុវជនជំនាន់ក្រោយ ឱ្យងាកមកស្រឡាញ់កីឡា ចូលរួមលេងកីឡាដើម្បីសុខភាព ព្រមទាំងបណ្តុះស្មារតីវិន័យ ការតស៊ូ អំណត់ព្យាយាម និងសាមគ្គីភាពតាមរយៈវិស័យកីឡា។ ចក្ខុវិស័យ និងការប្តេជ្ញាចិត្តក្នុងការកសាងធនធានមនុស្ស និងអនាគតដ៏រឹងមាំរបស់កម្ពុជានេះ ក៏បានឆ្លុះបញ្ចាំងយ៉ាងច្បាស់តាមរយៈសកម្មភាពទំនួលខុសត្រូវសង្គមជាច្រើនទៀតរបស់ក្រុមហ៊ុន ដែលបានបន្តចូលរួមគាំទ្រយ៉ាងសកម្មលើវិស័យអប់រំ វប្បធម៌ មនុស្សធម៌ និងការអភិវឌ្ឍសហគមន៍។

.
ក្រុមហ៊ុន វឌ្ឍនៈ នឹងនៅតែបន្តបេសកកម្មក្នុងការរួមចំណែកជាមួយសង្គមជាតិ ដើម្បីជំរុញ និងលើកកម្ពស់វិស័យកីឡាឱ្យកាន់តែរីកចម្រើនឈានឡើងជាលំដាប់ ព្រមទាំងបន្តផ្តល់កម្លាំងចិត្តដល់កីឡាករ-កីឡាការិនីខ្មែរគ្រប់រូប ឱ្យបន្តខិតខំហ្វឹកហាត់ និងអភិវឌ្ឍសមត្ថភាពឱ្យកាន់តែខ្លាំងក្លា ដើម្បីនាំមកនូវកិត្យានុភាព និងមោទនភាពជូនជាតិមាតុភូមិ៕