ពន្ធលើដីធ្លីមិនបានប្រើប្រាស់ ត្រូវបានកំណត់លើដីដែលគ្មានសំណង់ និងដីដែលមានសំណង់បោះបង់ចោល ស្ថិតក្នុងរាជធានីភ្នំពេញ ទីក្រុងនានា និងតំបន់ទាំងឡាយណាដែលកំណត់ដោយគណៈកម្មការវាយតម្លៃដីធ្លីមិនបានប្រើប្រាស់។ 

យ៉ាងណាមិញ នៅក្នុងកម្មវិធី “ពន្ធដារកម្ពុជា” ស្តីពីពន្ធលើអចលទ្រព្យ និងជាប់ពន្ធលើដីធ្លីមិនបានប្រើប្រាស់ លោកស្រី សំ ធិបវ៉ាត់ឌី ដែលជាអនុប្រធានការិយាល័យនៃអគ្គនាយកដ្ឋានពន្ធអចលទ្រព្យនិងអចលទ្រព្យនៃអគ្គនាយកដ្ឋានពន្ធដារ បាននិយាយថា ពន្ធលើដីធ្លីមិនបានប្រើប្រាស់នេះគឺត្រូវបានព្យួរការអនុវត្តរហូតដល់បំណាច់ឆ្នាំ២០២៤ ហើយនឹងត្រូវបានប្រមូលសារជាថ្មីម្តងទៀតនេះនៅក្នុងឆ្នាំ២០២៥ ដោយមានការបន្ធូរបន្ថយនៅលក្ខខណ្ឌលើកលែងពន្ធមួយចំនួនដូចជា៖

១. អនុវត្តចំពោះតែដីធ្លីមិនបានប្រើប្រាស់ទាំងឡាយណាដែលស្ថិតនៅក្រៅទីតាំងភូមិសាស្រ្តរដ្ឋបាលដែលជាកម្មវត្ថុលើអចលទ្រព្យក្នុងព្រះរាជាណាចក្រកម្ពុជា

២. ដីដែលជាកម្មវត្ថុនៃពន្ធលើដីធ្លីមិនបានប្រើប្រាស់នេះផងដែរ ត្រូវបានអនុញ្ញាតឱ្យកាត់ចេញ ៥ហិកតាក្នុងមួយកន្លែង ហើយដីដែលមានផ្ទៃក្រឡាក្រោម៥ហិកតា ឬក៏៥ម៉ឺនម៉ែត្រក្រឡាអ្នកជាប់ពន្ធមិនមានកាតព្វកិច្ចដាក់លិខិតប្រកាសសារពើពន្ធនិងបង់ប្រាក់ពន្ធនោះទេ

៣. សម្រាប់ដីដែលមានផ្ទៃក្រឡាលើសពី ៥ហិកតាឬក៏៥ម៉ឺនម៉ែត្រក្រឡា ត្រូវដាក់លិខិតប្រកាសសារពើពន្ធនិងបង់ប្រាក់ពន្ធលើដីធ្លីមិនបានប្រើប្រាស់ជូនរដ្ឋបាលសារពើពន្ធយ៉ាងយឺតបំផុតត្រឹមថ្ងៃទី៣០ ខែកញ្ញា ឆ្នាំ២០២៥ ជារៀងរាល់ឆ្នាំ ដោយអនុញ្ញាតឱ្យដកចេញនៅមូលដ្ឋានគិតពន្ធចំនួន៥ហិកតាឬក៏៥ម៉ឺនម៉ែត្រក្រឡាក្នុងមួយកន្លែង។

ជាមួយគ្នានោះដែរ ចំពោះដីដែលលើសពី ៥ហិកតា គឺអាចរួចពន្ធលើដីធ្លីមិនបានប្រើប្រាស់ ស្របតាមលក្ខខណ្ឌណាមួយដូចខាងក្រោម៖

• ដីកសិកម្មកំពុងបង្កបង្កើនផលដោយមានការបញ្ជាក់ពីគណៈកម្មការ ឬអនុគណៈកម្មការវាយតម្លៃដីសម្រាប់ពន្ធលើដីធ្លីមិនបានប្រើប្រាស់
• ដីកំពុងបម្រើសកម្មភាពសេដ្ឋកិច្ចរបស់រូបវន្តបុគ្គលឬនីតិបុគ្គល ដែលបានចុះបញ្ជីពន្ធដារនៅរដ្ឋបាលសារពើពន្ធ
• ដីមានសំណង់ ឬគ្មានសំណង់ស្ថិតក្រោមកិច្ចសន្យាជួល
• ដីដែលជាកម្មសិទ្ធិរបស់រាជរដ្ឋាភិបាល ឬស្ថាប័នរាជរដ្ឋាភិបាល
• ដីសម្បទានសេដ្ឋកិច្ចដែលជួលពីរដ្ឋ, ដីធ្លីរបស់សហគមន៍
• ដីជាកម្មសិទ្ធិរបស់រដ្ឋ ដែលបានជួលទៅឱ្យនីតិបុគ្គល ឬរូបវន្តបុគ្គលណាមួយ សម្រាប់ប្រើប្រាស់ជាសកម្មភាពសេដ្ឋកិច្ចផ្សេងៗតាម កិច្ចសន្យា ឬកិច្ចព្រមព្រៀងរវាងភាគីទាំងពីរ
• ដីដែលស្ថិតក្នុងតំបន់សេដ្ឋកិច្ចពិសេស ដែលបម្រើផ្ទាល់ដល់សកម្មភាពកសិកម្ម ឧស្សាហកម្ម និងសេវាកម្ម
• ដីដែលត្រូវបានចុះបញ្ជីជាទ្រព្យសម្បត្តិរបស់សហគ្រាសក្នុងវិស័យអប់រំ សិក្សាធិការ និងបណ្តុះបណ្តាលវិជ្ជាជីវៈ សម្រាប់គោលដៅបម្រើការងារក្នុងវិស័យដូចបានរៀបរាប់ខាងដើម។ ក្នុងករណីដែលដីនេះត្រូវបានលក់ឬមិនត្រូវបានប្រើប្រាស់តាមគោលដៅខាងលើ ត្រូវបំពេញកាតព្វកិច្ចពន្ធដារតាមច្បាប់ជាធរមាន៕ ទស្សនាវីដេអូពេញនៅទីនេះ៖ https://www.facebook.com/share/v/1L8jnvXS2e/