យោងតាមការចុះផ្សាយរបស់ទូរទស្សន៍ជាតិកម្ពុជា នៅថ្ងៃទី១២ ខែកញ្ញា ឆ្នាំ២០២៤ នេះបានឱ្យដឹងកំពូលតារាចម្រៀងរ៉េប លោក ម៉ាន់ វណ្ណដា និង លោក ជី ឌេវីត នឹងបង្ហាញវត្តមានក្នុងពិធីបើកព្រឹត្តិការណ៍កីឡាជាតិក្នុងឆ្នាំនេះ។
ប្រភពដដែលក៏បានឱ្យដឹងទៀតថា ក្រៅពីនេះក៏មានក្រុមតារារ៉េប របស់ផលិតកម្មបារមីផ្សេងទៀត នឹងចូលរួម ដែលមានដូចជា វណ្ណថាន់, ស៊ូហ្សានា,យូហៃ, "បទទេវរាជ" សម្តែង ដោយ លោក ជី ឌេវីត និងអ្នកនាង ទេព បូព្រឹក្ស, ក្រុម ឡា ស៊ីម៉ាកាទែល និងតារាជា ច្រើនរូបទៀតផងដែរ។
គួរជម្រាបផងដែរថា ក្រសួងអប់រំកម្ពុជាត្រៀមរៀបចំប្រកួតកីឡាជាតិលើកទី៤ និងកីឡាជាតិជនពិការលើកទី២ ក្នុងឆ្នាំ២០២៤ ដែលពិធីបើកព្រឹត្តិការណ៍កីឡា ឆ្នាំ២០២៤នេះ នឹងធ្វើឡើងក្រោមប្រធានបទ “កីឡាជាតិដើម្បីព្រែកជីកហ្វូណនតេជោ” ដែលនឹងប្រព្រឹត្តទៅចាប់ពីថ្ងៃទី២៩ ខែតុលា ដល់ថ្ងៃទី០៨ ខែវិច្ឆិកា ឆ្នាំ២០២៤។
ពិធីបើកជាផ្លូវការ នឹងធ្វើឡើងនៅថ្ងៃទី៣០ ខែតុលា ឆ្នាំ២០២៤ នៅពហុកីឡដ្ឋានជាតិអូឡាំពិក ចាប់ពីម៉ោង ៦ល្ងាចក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា។ ។
ក្នុងកម្មវិធីកីឡាជាតិលើកទី៤ នេះផងដែរគេបានកំណត់យកប្រភេទកីឡាចំនួន៣៦ លើ ៣២៨វិញ្ញាសា និងកីឡាជាតិជនពិការបានកំណត់យកចំនួន ១៣ប្រភេទកីឡា លើ ៥៥វិញ្ញាសា ដោយមានការចូលរួមចុះឈ្មោះប្រកួតពី២៥រាជធានី-ខេត្ត និងក្រសួងចំនួន០៣ ក្នុងនោះមាន ក្រសួងមហាផ្ទៃ ក្រសួងការពារជាតិ និងក្រសួងសេដ្ឋកិច្ច និងហិរញ្ញវត្ថុ៕
អត្ថបទដោយ៖ ពីង ជូអេង
