យោងតាមការចុះផ្សាយរបស់ក្រសួងអប់រំ យុវជននិងកីឡាបានឱ្យដឹងថា វិទ្យាស្ថានពហុបច្ចេកទេសភូមិភាគតេជោសែនខេត្តកំពត កំពុងបើកវគ្គសិក្សាថ្មី ជ្រើសរើសសិស្សឱ្យចូលរៀនជំនាញវិជ្ជាជីវៈ និងបច្ចេកទេស ដល់យុវជនមកពីគ្រួសារក្រីក្រ គ្រួសារងាយរងហានិភ័យ លើមុខជំនាញចំនួន៧ ដោយពុំចាំបាច់បង់ប្រាក់ និងទទួលបានប្រាក់ឧបត្ថមប្រចាំខែ ចំនួន២៧ម៉ឺនរៀល។
ចំពោះមុខជំនាញវិជ្ជាជីវៈ ដែលវិទ្យសា្ថននឹងធ្វើការបណ្តុះបណ្តាល ដល់យុវជនមានដូចជា៖
១. ការងារកំបោរ
២. ការដំឡើងបណ្តេញអគ្គិសនី ក្នុងអគារ
៣. ការថែទាំនិងជួសជុលរថយន្ត
៤. ការថែទាំនិងជួសជុលអគ្គិសនីរថយន្ត
៥. ការថែទាំនិងជួសជុលម៉ាស៊ីនត្រជាក់រថយន្ត
៦. សេវាកម្មកុំព្យូទ័រ
៧. ការកៃច្នៃបន្លែនិងផ្លែ ឈើ
ទន្ទឹមនឹងនេះអត្ថប្រយោជន៍ក្រោយសិក្សាសិស្សនឹងទទួលបានជំនាញមួយពិតប្រាកដ ការងារដែលមានទីផ្សារសមរម្យ និងប្រាក់ចំណូលទៀតទាត់ ជាមួយសញ្ញាបត្របច្ចេកទេសនិងវិជ្ជាជីវៈ១ និងឱកាសបន្តការសិក្សាផងដែរ។
ដោយឡែកសម្រាប់ការចុះឈ្មោះចូលរៀន សិស្សអាចធ្វើការចុះឈ្មោះ ចាប់ពីថ្ងៃផ្សាយដំណឹងនេះតទៅ តាមរយៈប្រព័ន្ធអនឡាញ www.tvet.gov.kh ដែលមានវេនសិក្សាចំនួន៣ ព្រឹក ល្ងាចនិងយប់។
ក្នុងនោះសម្រាប់ ថ្ងៃចន្ទ-សុក្រ វេនសិក្សាព្រឹកនិងល្ងាច ដោយសិក្សា៨ម៉ោង ក្នុង១ថ្ងៃ ដែលមានរយៈពេល៤ខែក្នុងមួយវគ្គ។ សម្រាប់វេនពេលយប់ ចន្ទ-សុក្រ នឹងសិក្សារយៈពេល៤ម៉ោងក្នុងមួយថ្ងៃ រយៈពេល៨ខែក្នុងមួយវគ្គ ដោយចូលរៀននៅម៉ោង៥:៣០នាទីរសៀល ដល់ម៉ោង៨:៣០នាទីយប់។ ចំពោះវេនសិក្សាថ្ងៃសៅរ៍-អាទិត្យ សម្រាប់ម៉ោងព្រឹក-ល្ងាច សិស្សត្រូវសិក្សារយៈពេល៨ម៉ោងក្នុងមួយថ្ងៃ មានរយៈពេលសិក្សា១០ខែក្នុងមួយវគ្គ។
គួរជម្រាបថាវិទ្យាស្ថានពហុបច្ចេកទេសភូមិភាគតេជោសែន គឺជាគ្រឹះស្ថានឧត្តមសិក្សារបស់រដ្ឋតែមួយគត់ នៅក្នុងខេត្តកំពត មានអាសយដ្ឋាននៅភូមិ១ឧសភា សង្កាត់កំពង់កណ្តាល ក្រុងកំពត ខេត្តកំពត ដែលមានលេខទូរស័ព្ទទំនាក់ទំនង ០១២ ២៨ ៩៩ ៩២/ ០១២ ៩៩ ០៨ ៩៨/ ០៩៧ ៣៣៣ ៧១ ៩១/ ០១០ ៣៧ ៤៤ ៣៦៕
អត្ថបទដោយ៖ ពីង ជូអេង