នៅព្រឹកថ្ងៃទី១៥ ខែមករា ឆ្នាំ២០២៤ យីហោកាហ្វេដ៏ល្បីឈ្មោះក្នុងប្រទេសកម្ពុជា TUBE Coffee Central បានប្រកាសពីការប្តូរឈ្មោះរបស់ខ្លួនពី TUBE Central ទៅជា TUBE Coffee + ដែលជានិមិត្តសញ្ញានៃហាងដែលលក់កាហ្វេបូករួមជាមួយអាហារ។
ចំពោះការផ្លាស់ប្តូរឈ្មោះនេះដែរធ្យូបកាហ្វេមានគោលបំណងពង្រីកបន្ថែមភាពងាយស្រួលជូនអតិថិជនស្វែងរកកាហ្វេ និងអាហារដែលមានគុណភាពខ្ពស់ តម្លៃសមរម្យ សេវាកម្មរហ័សនៅក្នុងកន្លែងតែមួយ ដោយមិនពិបាករឿងបញ្ហារកអាហារថ្ងៃត្រង់អំឡុងពេលអង្គុយពិសារឬកាហ្វេធ្វើការនៅក្នុងហាងធ្យូបកាហ្វេនោះឡើយ។
ហាង TUBE Coffee + មានមុខម្ហូបដែលត្រូវបាន រៀបរៀងយ៉ាងយកចិត្តទុកដាក់ជាមួយនឹងគ្រឿងផ្សំក្នុងស្រុកដែលមានគុណភាព ការវេចខ្ចប់យ៉ាងប្រណិត ធានាបាននូវអនាម័យ និងរសជាតិឆ្ងាញ់ ដោយអតិថិជនអាចទទួលបានរសជាតិអាហារខ្មែរបែបចិញ្ចើមផ្លូវទំនើបដែលមានគុណភាពខ្ពស់ មានតម្លៃសមរម្យចាប់ពី 3.20 ដុល្លារតែប៉ុណ្ណោះ។
ក្នុងកម្មវិធីសន្ទុរកថាសម្ពោធឱ្យប្រើប្រាស់ឈ្មោះជាផ្លូវការ TUBE Coffee + នេះ កញ្ញា ស៊ូ ម៉ីន្នពេជ្រ នាយកប្រតិបត្តិនៃក្រុមហ៊ុន Tube Café បានគូសបញ្ជាក់ថានាពេលបច្ចុប្បន្ននេះ TUBE Coffee + ដែលមានបម្រើសេវាកម្មអាហារមានចំនួន ៦ សាខាហើយនៅទូទាំងរាជធានីភ្នំពេញរួមមាន៖
- ធ្យូប កាហ្វេ ផ្លឹស ជ្រោយចង្វារ
- ធ្យូប កាហ្វេ ផ្លឹស កោះពេជ្រ
- ធ្យូប កាហ្វេ ផ្លឹស ចំការដូង
- ធ្យូប កាហ្វេ ផ្លឹស កាណាឌីយ៉ា និងវឌ្ឈនៈផាក
- ធ្យូប កាហ្វេ ផ្លឹស រាជធានី
- ធ្យូប កាហ្វេ ផ្លឹស ទួលគោក
គួររំលឹកផងដែរថា ក្រុមហ៊ុន ធ្យូបកាហ្វេ ឯ.ក គឺជាយីហោរបស់ខ្មែរត្រូវបានបង្កើតឡើងដោយកូនខ្មែរផ្ទាល់ ដែលមានសហស្ថាបនិកខ្មែរ ៣រូប ។ នាពេលបច្ចុប្បន្ននេះយីហោកាហ្វេខ្មែរមួយនេះបានឈរជើងយ៉ាងរឹងមាំជាង៧ឆ្នាំមកហើយក្នុងទីផ្សារកម្ពុជាស្ទើរគ្រប់ខេត្តក្រុង ខណៈធ្យូបកាហ្វេមានមហិច្ចតានាំយកយីហោខ្មែរមួយនេះទៅលើទីផ្សារអន្តរជាតិក្នុងពេលឆាប់ៗខាងមុខនេះ៕
អត្ថបទ៖ ពីង ជូអេង
