នៅថ្ងៃទី១៣ ខែឧសភា ឆ្នាំ២០២៦ លោកប្រធានាធិបតី ដូណាល់ ត្រាំ បានដឹកនាំក្រុមមហាសេដ្ឋីលំដាប់កំពូលៗរបស់អាមេរិក ធ្វើដំណើរទស្សនកិច្ចទៅកាន់ទីក្រុងប៉េកាំង ដើម្បីចូលរួមកិច្ចប្រជុំកំពូលជាមួយប្រធានាធិបតីចិន លោក ស៊ី ជិនពីង។ យោងតាមការចុះផ្សាយរបស់សារព័ត៌មាន The Guardian កិច្ចពិភាក្សាជាប្រវត្តិសាស្ត្រនេះនឹងផ្ដោតលើបញ្ហាស្នូលចំនួន ៥ ដែលជាចំណុចរបត់សម្រាប់ទំនាក់ទំនងអន្តរជាតិ៖

១/. ការដោះស្រាយសង្គ្រាមពាណិជ្ជកម្ម និងពន្ធដារ៖ របៀបវារៈចម្បងបំផុត គឺការពិភាក្សាលើគោលនយោបាយពន្ធដារ។ ភាគីអាមេរិកព្យាយាមជំរុញឱ្យចិនបើកចំហទីផ្សារឱ្យកាន់តែទូលំទូលាយសម្រាប់ទំនិញអាមេរិក និងកាត់បន្ថយរបាំងពាណិជ្ជកម្មដែលបានអូសបន្លាយជាច្រើនឆ្នាំមកនេះ។

២/. បញ្ហាសន្តិសុខនៅច្រកសមុទ្រតៃវ៉ាន់៖ ស្ថិរភាពនៅក្នុងតំបន់ច្រកសមុទ្រតៃវ៉ាន់ នៅតែជាប្រធានបទដ៏ក្ដៅគគុក។ មេដឹកនាំទាំងពីរត្រូវបានគេរំពឹងថានឹងពិភាក្សាដើម្បីបញ្ចៀសការយល់ច្រឡំផ្នែកយោធា និងស្វែងរកយន្តការគ្រប់គ្រងវិបត្តិ ដើម្បីរក្សាសន្តិសុខក្នុងតំបន់អាស៊ីប៉ាស៊ីហ្វិក។

៣/. ការគ្រប់គ្រងបច្ចេកវិទ្យាបញ្ញាសិប្បនិម្មិត៖ ស្របពេលដែលមហាអំណាចទាំងពីរមានការជឿនលឿនខ្លាំងលើផ្នែកបច្ចេកវិទ្យា ការកំណត់បទដ្ឋានរួមសម្រាប់ការប្រើប្រាស់ AI ប្រកបដោយសុវត្ថិភាព និងការគ្រប់គ្រងហានិភ័យនៃអាវុធស្វ័យប្រវត្តិ គឺជាចំណុចសំខាន់ដែលត្រូវយកមកជជែក។

៤/. សន្តិសុខសាយប័រ និងការលួចចម្លងទិន្នន័យ៖ ការចោទប្រកាន់ជុំវិញការវាយប្រហារតាមប្រព័ន្ធអ៊ីនធឺណិត និងការលួចចម្លងកម្មសិទ្ធិបញ្ញា គឺជាឧបសគ្គដ៏ធំក្នុងទំនាក់ទំនងទ្វេភាគី។ លោក ត្រាំ ត្រូវបានគេរំពឹងថានឹងដាក់សម្ពាធលើការការពារទិន្នន័យសាជីវកម្មអាមេរិកដែលកំពុងរកស៊ីនៅក្នុងប្រទេសចិន។

៥/. កិច្ចសហប្រតិបត្តិការលើបញ្ហាអាកាសធាតុ៖ ទោះបីជាមានភាពតានតឹងផ្នែកនយោបាយ ប៉ុន្តែក្នុងនាមជាប្រទេសដែលបញ្ចេញឧស្ម័នផ្ទះកញ្ចក់ច្រើនជាងគេ មេដឹកនាំទាំងពីរនឹងពិភាក្សាអំពីការប្តេជ្ញាចិត្តរួមគ្នាក្នុងការកាត់បន្ថយការឡើងកម្ដៅផែនដី និងការវិនិយោគលើថាមពលស្អាត។

គួរជម្រាបផងដែរថា វត្តមានរបស់មហាសេដ្ឋីអាមេរិកក្នុងបេសកកម្មនេះ បង្ហាញពីយុទ្ធសាស្ត្រការទូតសេដ្ឋកិច្ច របស់លោក ត្រាំ ដែលចង់ប្រើប្រាស់ឥទ្ធិពលវិស័យឯកជន ដើម្បីធ្វើជាស្ពានចរចាជាមួយទីក្រុងប៉េកាំង។ លទ្ធផលនៃកិច្ចប្រជុំនេះ នឹងក្លាយជាត្រីវិស័យកំណត់វាសនាសេដ្ឋកិច្ចពិភពលោកសម្រាប់ប៉ុន្មានឆ្នាំខាងមុខទៀត៕

អត្ថបទដោយ៖ កាន់ ដារ៉ា (ម្ចាស់ស្នាដៃសៀវភៅ បុគ្គលិកឆ្នើម)

• សម្រាប់បុគ្គលិកដែលចង់បាន ចំណូលកើន ឡើងតួនាទីលឿន
• ម្ចាស់អាជីវកម្មដែលចង់កសាងក្រុមការងារដែកថែបបង្កើតលទ្ធផលខ្ពស់
• យើងសូមណែនាំសៀវភៅ «បុគ្គលិកឆ្នើម» តម្លៃពេញ ១២$ បើកក់ឥឡូវនេះតម្លៃត្រឹមតែ ១០$ ប៉ុណ្ណោះ។   បញ្ជាទិញតាម https://t.me/BusinessCambodiaBook