កាលពីពាក់កណ្ដាលឆ្នាំ២០២២កន្លងទៅ ក្រុមហ៊ុនផលិតរថយន្ដជប៉ុន TOYOTA បានបោះទុនវិនិយោគចំនួន ៣៦.៨ លានដុល្លារ បង្កើតរោងចក្រដំឡើងរថយន្ដរបស់ខ្លួននៅកម្ពុជាដែលឈ្មោះថា Toyota Tsusho Manufacturing (Cambodia) Co., Ltd. (“TTMC”) ក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ ដើម្បីលក់នៅទីផ្សារក្នុងស្រុក និងនាំចេញផងដែរ។
យ៉ាងណា យោងតាមប្រសាសន៍លើកឡើងរបស់សម្ដេចតេជោ ហ៊ុន សែន នាយករដ្ឋមន្រ្ដី ក្នុងពិធីសំណេះសំណាលជាមួយបងប្អូនកម្មករ និយោជិត នៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ នៅថ្ងៃទី២៦ ខែឧសភា ឆ្នាំ២០២៣ នេះបានឲ្យដឹងថា គម្រោងរោងចក្រដំឡើងរថយន្ដ TOYOTA ខាងលើអាចនឹងបើកដំណើរការនៅក្នុងខែកក្កដាខាងមុខនេះហើយ។
ថ្លែងនៅក្នុងពិធីសំណេះសំណាលខាងលើសម្ដេចតេជោនាយករដ្ឋមន្រ្ដីបានមានប្រសាសន៍បញ្ជាក់ដូច្នេះថា “បន្ដិចទៀតខែកក្កដានេះ រោងចក្រដំឡើងរថយន្ដ TOYOTA គឺនឹងរួចរាល់ អាចនឹងចាប់ផ្ដើមផលិតរថយន្ដនៅតំបន់សេដ្ឋកិច្ចពិសេសនេះ”។
សូមជម្រាបថា បើតាមការបញ្ជាក់ពីក្រុមហ៊ុន TOYOTA Cambodia កាលពីពេលកន្លងទៅ នៅពេលរោងចក្រនេះបើកដំណើរ ក្រុមហ៊ុននឹងធ្វើដំឡើងថយន្តប្រភេទ Pick-up និង SUV មុនគេដែលមានដូចជា TOYOTA HILUX និង TOYOTA FORTUNER ។ ក្នុងនោះដែរ នៅពេលរោងចក្រថ្មីនេះបើកដំណើរការ ក៏នឹងបង្កើតឱកាសការងារចំនួន ១៥០ កន្លែងដល់ប្រជាពលរដ្ឋកម្ពុជា៕
អត្ថបទ៖ កឹម ប៊ុនធឿន
