ភ្នំពេញ៖ ថ្ងៃទី ១៣ ខែវិច្ឆិកា ឆ្នាំ ២០២៦ កោះពេជ្របានរៀបចំការប្រគំតន្ត្រីសប្បុរសធម៌មួយកាលពីថ្ងៃទី ១២ ខែវិច្ឆិកា នៅការិយាល័យលក់កោះពេជ្រ (Koh Pich Sales Center) ដើម្បីគាំទ្រដល់អង្គការ «Toutes à l’école» ដែលជាអង្គការមិនរកប្រាក់ចំណេញរបស់បារាំង ធ្វើការលើការពង្រីកឱកាសទទួលបានការអប់រំសម្រាប់កុមារីនៅកម្ពុជា។

ព្រឹត្តិការណ៍នេះបានប្រព្រឹត្តទៅក្នុងពេលដែលកម្ពុជាកំពុងត្រៀមខ្លួនធ្វើជាម្ចាស់ផ្ទះរៀបចំកិច្ចប្រជុំកំពូលហ្រ្វង់កូហ្វូនី (Francophonie) លើកទី ២០ ដោយកម្មវិធីទាំងមូលត្រូវបានបំផុសគំនិតឡើងតាមរយៈវប្បធម៌តន្ត្រីនៃទីក្រុងប៉ារីសក្នុងសតវត្សរ៍ទី ១៩។ កម្មវិធីនេះមានការចូលរួមសម្តែងដោយអ្នកលេងព្យាណូ Julian Gargiulo ដែលបានលេងស្នាដៃតន្ត្រីរបស់លោក Frédéric Chopin ដោយមានការចូលរួមច្រៀងពីសំណាក់លោក ឃួន សិទ្ធិស័ក (Sethisak Khuon) ដែលជាអ្នកចម្រៀងសំឡេងតេន័រ (Tenor) ជនជាតិកម្ពុជា។ លើសពីនេះ លោក Gargiulo ក៏បានចែករំលែករឿងរ៉ាវអំពីជីវិតរបស់លោក Chopin និងប្រវត្តិទាក់ទងនឹងស្នាដៃតន្ត្រីដែលបានយកមកសម្តែងផងដែរ។

ដោយរំលឹកឡើងវិញអំពីប្រតិកម្មរបស់អ្នកទស្សនា លោក Gargiulo បាននិយាយថា៖ «វាពិតជាសប្បាយរីករាយណាស់ ហើយខ្ញុំពិតជារីករាយដែលបានឃើញពីរបៀបដែលទស្សនិកជនឆ្លើយតបទៅនឹងតន្ត្រីនោះ។ ខ្ញុំគិតថា នៅពេលដែលយើងធ្វើឱ្យតន្ត្រីបុរាណមានលក្ខណៈមិនសូវតឹងរ៉ឹង ឬមិនសូវផ្លូវការពេក មនុស្សម្នាអាចមានអារម្មណ៍ធូរស្រាល រីករាយជាមួយវា និងអាចភ្ជាប់អារម្មណ៍ទៅនឹងតន្ត្រីនោះបានដោយធម្មជាតិជាងមុន»។

គំនិតផ្តួចផ្តើមនេះទទួលបានការគាំទ្រពីក្រុមហ៊ុន OCIC, Pandora, Attwood, Vintage, Supersound និង Dara Hotel។

រាល់ប្រាក់ចំណូលដែលទទួលបានពីការលក់សំបុត្រ និងការបរិច្ចាគនានាក្នុងអំឡុងពេលព្រឹត្តិការណ៍នេះ នឹងត្រូវផ្តល់ជូនដោយផ្ទាល់ទៅកាន់អង្គការ Toutes à l’école។ អង្គការនេះត្រូវបានបង្កើតឡើងក្នុងឆ្នាំ ២០០៥ ដោយអ្នកសារព័ត៌មានជនជាតិបារាំងម្នាក់ឈ្មោះ Tina Kieffer ដោយបានបង្កើតសាលា Happy Chandara ដើម្បីផ្តល់ការអប់រំដោយឥតគិតថ្លៃដល់កុមារីដែលមកពីគ្រួសារខ្វះខាត។ បច្ចុប្បន្ននេះ សាលារៀននេះមានសិស្សានុសិស្សជាង ១,០០០ នាក់ ចាប់ពីកម្រិតមត្តេយ្យសិក្សារហូតដល់កម្រិតមធ្យមសិក្សា។ បេសកកម្មរបស់វាឆ្លុះបញ្ចាំងពីជំនឿរបស់ Kieffer ដែលថា «ការផ្តល់ការអប់រំដល់ក្មេងស្រី ជួយជំរុញពិភពលោកឱ្យឈានទៅមុខ»៕