គិតត្រឹមឆមាសទី១ នៃឆ្នាំ២០២៥ ការចុះបញ្ជីគម្រោងវិនិយោគនៅកម្ពុជាមានចំនួន ៣៧៣គម្រោង ខណៈទុនវិនិយោគសរុបមានចំនួនប្រមាណ ៥,៨ ពាន់លានដុល្លារអាម៉េរិក និងបានបង្កើតការងារប្រមាណ ២៥៥ ពាន់កន្លែង។ នេះបើយោងតាមរបាយការណ៍ក្រុមប្រឹក្សាអភិវឌ្ឍន៍កម្ពុជា (CDC) ចេញផ្សាយនាថ្ងៃទី ០៧ ខែ កក្កដា។

ក្នុងនោះប្រទេសដែលបានបណ្តាក់ទុនវិនិយោគនៅកម្ពុជាច្រើនជាងគេបំផុតគឺ ចិនមានចំនួន ៥៦.២៣%, កម្ពុជាខ្លួនឯងមានចំនួន ២៩.៧៦% និងសិង្ហបុរីមានចំនួន ៧.៧២% នៃទុនវិនិយោគសរុប។ ក្រៅពីនេះមានដូចជា វៀតណាមចំនួន ៣.០១%, កោះ British Virgin ចំនួន ១.០៨%, ចក្រភពអង់គ្លេសចំនួន ០.៥៦%, កោះ Cayman ចំនួន ០.៥១%, សហរដ្ឋអាមេរិក ចំនួន ០.៣៧%, កោះ Samoa ០.៣៤% និងសាធារណរដ្ឋកូរ៉េ (កូរ៉េខាងត្បូង) ចំនួន ០.១៥%។

គួរជម្រាបផងដែរថា ការវិនិយោគមកកាន់កម្ពុជាពីបណ្តាប្រទេសជាច្រើននៅតំបន់អាស៊ី និងបណ្តាអាស៊ីប៉ាស៊ីហ្វិក កំពុងកើនឡើងគួរឲ្យកត់សម្គាល់។ ជាពិសេស ការរួមចំណែករបស់កម្ពុជា និងសិង្ហបុរីបង្ហាញថាកម្ពុជា​កំពុងអភិវឌ្ឍជាទីផ្សារមានសក្តានុពលសម្រាប់វិនិយោគក្នុងតំបន់អាស៊ីអាគ្នេយ៍៕