បណ្ដាញសង្គម Tik Tok ត្រូវបានគេចាត់ទុកថាជាបណ្ដាញសង្គមវ័យក្មេងមួយ ប៉ុន្តែទទួលបាននូវភាពរីកចម្រើនលឿនរហ័សគួរឱ្យកត់សម្គាល់ដូចផ្លេកបន្ទោរអ៊ីចឹងដែរ។ គិតត្រឹមឆ្នាំ២០២៣នេះ បណ្ដាញសង្គមមួយនេះ មានអ្នកប្រើប្រាស់ប្រចាំខែរហូតដល់ទៅជាង១ពាន់លាននាក់ និងត្រូវបានគេប៉ាន់ស្មានថាមានតម្លៃខ្លួនសរុបខ្ទង់ ៧៥ពាន់លានដុល្លារ ហើយរំពឹងថានឹងអាចរកចំណូលបាន១២ពាន់លានដុល្លារនៅឆ្នាំ២០២៣នេះ។
ស្ថិតនៅក្រោមដំបូលក្រុមហ៊ុនមេ ByteDance ដែលមានលោក Zhang Yiming ជាស្ថាបនិក និងលោក Shou Zi Chew ជាCEO ក្រុមហ៊ុននេះ គឺបានផ្សែផ្សំគ្រឿងជាច្រើនដំណាក់កាល មុនពេលដែលប្រសូតបណ្ដាញសង្គម Tik Tok នេះឡើងមក។ ប៉ុន្តែនៅក្នុងឆ្នាំ២០២១ ស្របពេលដែលរដ្ឋាភិបាលចិនរឹតបណ្ដឹងការធ្វើអាជីវកម្មតាមប្រព័ន្ធបច្ចេកវិទ្យា លោក Zhang Yiming ក៏បានលាឈប់ពីតំណែងជា CEO ក្រុមហ៊ុនផងដែរ។
តើថ្នាក់ដឹកនាំបណ្ដាញសង្គមវ័យក្មេងនេះ មានយុទ្ធសាស្ត្រជំនួញបែបណា ទើបអាចស្រូបអ្នកប្រើប្រាស់បានរាប់ពាន់លាននាក់ ក្នុងរយៈពេលខ្លីបែបនេះ?
១. ចេះច្របាច់ភាពខ្លាំងបញ្ចូលគ្នា
រំលឹកទៅកាន់គ្រាដើមបន្តិច បណ្ដាញសង្គម Tik Tok នេះគឺចាប់កំណើតឡើង ក្រោយពេលដែល ក្រុមហ៊ុនមេ ByteDance បានទិញយកកម្មវិធីតន្រ្តីមួយឈ្មោះ Musical.ly ក្នុងតម្លៃ ១ពាន់លានដុល្លារ មកច្របាច់បញ្ចូលគ្នាគឺរវាង កម្មវិធីផុសវីដេអូខ្លីៗ១៥វិនាទីទៅ១០នាទីឈ្មោះ Douyin ជាមួយនឹងកម្មវិធីតន្ត្រី Musical.ly ទើបបំប្លែងចេញជាកម្មវិធី Tik Tok។ ការប្របាច់បញ្ចូលគ្នានេះ ធ្វើឱ្យកម្មវិធី Tik Tok កាន់តែទាក់ទាញ មានអ្នកគាំទ្រសរុបកាន់តែកើនឡើងផងដែរ។
២. ផ្ដោតលើការច្នៃប្រឌិតនិងបង្កើតថ្មីខ្លាំងបំផុត
បើតាមប្រសាសន៍អ្វីដែលមេធំ លោក Zhang Yiming ធ្លាប់បានចែករំលែក គឺក្រុមហ៊ុននេះបានផ្ដោតសំខាន់ខ្លាំងទៅលើគំនិតច្នៃប្រឌិត និងគំនិតបង្កើតថ្មីខ្លាំងបំផុត។ លោកបន្ថែមថា យើងកំពុងធ្វើការងារប្រកបដោយភាពច្នៃប្រឌិត។ យើងមិនមែនជាអ្នកលួចចម្លងពីក្រុមហ៊ុនអាមេរិកទេ ទាំងផលិតផល និងបច្ចេកវិទ្យា។
បើយើងក្រឡែកមើលជាក់ស្ដែងបណ្ដាញសង្គមមួយនេះ គឺមានគំនិតច្នៃប្រឌិតខ្ពស់ខុសពីគេ ជាពិសេសទាក់ទងនឹងរយៈពេលផុសវីដេអូមួយ គឺមានរយៈពេលខ្លះចាប់ពី១៥វិនាទីតែប៉ុណ្ណោះ ដែលវាត្រូវជាមួយនឹងទំនោរមនុស្សសម័យថ្មី ដែលចង់ទស្សនាអ្វីមួយលឿន រហ័ស ច្បាស់លាស់ និងខ្លីៗ។
យ៉ាងណាមិញ ដោយសារតែភាពរីកចម្រើនលឿនរបស់បណ្ដាញសង្គមមួយនេះ បានធ្វើឱ្យលោក Mark Zuckberg ដែលជាមេធំរបស់ក្រុមហ៊ុន Meta បានសម្ដែងការព្រួយបារម្ភយ៉ាងខ្លាំង ព្រមទាំងបានមានប្រសាសន៍ថា ក្រុមហ៊ុននេះមានសន្ទុះរីកចម្រើនលឿនខ្លាំង។ ទន្ទឹមនឹងការកោតសរសើរ លោកក៏បានបង្ហើបផងដែរថា បណ្ដាញសង្គម Tik Tok អាចនឹងគម្រាមកំហែងចំពោះអាជីវកម្មរបស់អាមេរិកផងដែរ៕
