តំបន់សេដ្ឋកិច្ចពិសេសថ្មីៗចំនួន ៣ នឹងលេចរូបរាងនៅក្នុងកំពត និងខេត្ដកំពង់ស្ពឺ។ ដោយក្នុងនោះខេត្ដកំពតមានចំនួន ២ គឺនៅស្រុកជុំគិរី និងក្រុងបូកគោ ខណៈខេត្ដកំពង់ស្ពឺមានចំនួន ១ ។ ហើយគម្រោងនេះនឹងរំពឹងថាអាចបង្កើតឱការងារ និងជំរុញសេដ្ឋកិច្ចប្រជាជន ព្រមទាំងសេដ្ឋកិច្ចជាតិផងដែរ។

តាមការបញ្ជាក់ពីក្រុមប្រឹក្សាអភិវឌ្ឍន៍កម្ពុជាកាលពីពេលថ្មីៗកន្លងទៅបានឲ្យដឹងថា តំបន់សេដ្ឋកិច្ចពិសេសនៅខេត្ដកំពត និងខេត្ដកំពង់ស្ពឺនេះនឹងក្លាយជាកម្លាំងចលករយ៉ាងសំខាន់ក្នុងការស្រូបយកគម្រោងវិនិយោគមកបណ្តាក់ទុននៅក្នុងតំបន់សេដ្ឋកិច្ចពិសេសទាំងនេះ និងជាទីកន្លែងដែលអាចបង្កេីតការងារជូនបងប្អូនប្រជាពលរដ្ឋ បង្កេីនផលិតផលក្នុងស្រុក លេីកកម្ពស់ជីវភាពរស់នៅរបស់ប្រជាជននៅក្នុងខេត្តកំពត ជាពិសេសចូលរួមចំណែកជំរុញកំណេីនសេដ្ឋកិច្ចជាតិ។

សូមជម្រាបថា ក្នុងរយៈពេល១០ខែនៃ ឆ្នាំ២០២៥នេះ គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជាបានសម្រេចុះបញ្ជីគម្រោងវិនិយោគចំនួន ៥៧៥ គម្រោង ក្នុងទំហំទុនវិនិយោគសរុប ប្រមាណ ៩,២ ពាន់លានដុល្លារ។ ក្នុងនោះគម្រោងវិនិយោគមានការកើនឡើងចំនួន ២២៩គម្រោង ស្មើនឹងប្រមាណ ៦៦% ខណៈទុនវិនិយោគមានការកើនឡើងប្រមាណជិត ៣,៧ ពាន់លានដុល្លារ ស្មើនឹងប្រមាណ ៦៧% បើប្រៀបធៀបនឹងរយៈពេលដូចគ្នាក្នុងឆ្នាំ២០២៤ ដែលមានគម្រោងវិនិយោគត្រឹមតែ ៣៤៦គម្រោង ក្នុងទំហំទុនវិនិយោគប្រមាណ ៥,៥ ពាន់លានដុល្លារ៕