នាពេលខាងមុខនេះ ខេត្ដកំពង់ឆ្នាំងនឹងក្លាយជាខេត្ដដែលមានស្ពានវែងជាងគេនៅកម្ពុជាមានប្រវែងសរុបជាង ៣ គីឡូម៉ែត្រ ដែលសាងសង់ឆ្លងកាត់ទន្លេសាបភ្ជាប់ទៅខេត្ដកំពង់ធំ។ នេះបើយោងតាមការបញ្ជាក់ពីឯកឧត្ដម ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួងសាធារណការ និងដឹកជញ្ជូននាពេលថ្មីៗនេះ។
តាមការលើកឡើងពីឯកឧត្ដម ស៊ុន សុវណ្ណារិទ្ធិ អភិបាលនៃគណៈអភិបាលខេត្ដកំពង់ឆ្នាំងគម្រោងស្ពានឆ្លងកាត់ទន្លេសាបនេះមានប្រវែង ៣.៩ គីឡូម៉ែត្រ ប៉ុន្ដែតាមការបញ្ជាក់ចុងក្រោយពីឯកឧត្ដមទេសរដ្ឋមន្ដ្រី ស៊ុន ចាន់ថុល ការសិក្សាដូរទីតាំងថ្មីស្ពាននេះមានប្រវែង ៣.៣ គីឡូម៉ែត្រ។
ថ្លែងនៅក្នុងពិធីអញ្ជើញចុះពិនិត្យទីតាំងសាងសង់កំពង់ផែពហុបំណង និងមណ្ឌលភស្តុភារកម្មកំពង់ឆ្នាំង នៅថ្ងៃទី០៩ ខែមីនា ឆ្នាំ២០២៣ ឯកឧត្ដមទេសរដ្ឋមន្ដ្រីបានមានប្រសាសន៍ថា «ឯកឧត្ដមអភិបាលខេត្ដលើកឡើងមិញស្ពាន ៣.៩ គីឡូម៉ែត្រ ប៉ុន្ដែឥឡូវយើងដូរទីតាំងតែ ៣.៣ គីឡូម៉ែត្រទេ ប៉ុន្ដែជាស្ពានវែងជាងគេបំផុតនៅកម្ពុជាយើង ៣.៣គីឡូនេះឯង»។
សូមជម្រាបផងដែរថា បច្ចុប្បន្នស្ពានដែលវែងជាងគេនៅក្នុងប្រទេសកម្ពុជា គឺស្ពានត្សឹបាសា ឬស្ពានអ្នកលឿន មានប្រវែងសរុប ២ ២១៥ ម៉ែត្រ សាងសង់ឆ្លងកាត់ទន្លេងមេគង្គ ភ្ជាប់ពីខេត្តកណ្តាល ទៅខេត្តព្រៃវែង និងឆ្ពោះទៅខេត្តស្វាយរៀង ៕
អត្ថបទ៖ កឹម ប៊ុនធឿន
