ការឆបោកតាមអ៊ីនធឺណិត នៅក្នុងប្រទេសថៃមានចំនួនជាង ៣២៦,៩៩២ករណី ដែលផ្ដល់ផលប៉ះពាល់ដល់ជនរងគ្រោះ និងបង្ករការខាតបង់គិតជាប្រាក់សរុបជាង ៤៥.២៤៥ពាន់លានបាត (ប្រហែល ជាង ១ពាន់លានដុល្លារ)។ នៅក្នុងនោះការឆបោកកូនកាត់ (Hybrid Scam) ជាប្រភេទឆបោក Online ដែលមានចំនួនច្រើនបំផុត ពោលគឺដល់ទៅ ៣,២៨០ករណី គិតជាប្រាក់សរុបប្រមាណជាង ២.៧ពាន់លានបាត (ជាង ៧៤.៩២លានដុល្លារ)។
យោងតាមការចុះផ្សាយរបស់សាព័ត៌មាន khaosod របស់ថៃ បានឱ្យដឹងថា នៅថ្ងៃទី១៨ ខែកញ្ញា ឆ្នាំ២០២៣ ការិយាល័យស៊ើបអង្កេតឧក្រិដ្ឋកម្មតាមអ៊ីនធឺណិត និងការរិយាល័យប្រឆាំងការលាងលុយកខ្វក់ បានត្រៀមទឹកប្រាក់ចំនួនជាង ៦០០លានបាត (ខ្ទង់ ១៦.៦៥លានដុល្លារ) ទុកសម្រាប់ចែកជូនឱ្យទៅកាន់ជនរងគ្រោះ ដែលមានបញ្ហាដោយសារតែ ការឆបោក Online កូនកាត់ (Hybrid Scam)។
ថ្ងៃដំបូងបន្ទាប់ព័ត៌មាននេះត្រូវបានប្រកាសមានមនុស្សជាង ១,២០០នាក់បានចុះឈ្មោះ ដែលរួមមានដូចជាម្ចាស់អាជីវកម្ម បុគ្គលិកយោធា វេជ្ជបណ្ឌិត គិលានុបដ្ឋាយិកា និងសូម្បីតែព្រះសង្ឃ ក៏មកដាក់ពាក្យបណ្ដឹងយកប្រាក់លើកទឹកចិត្តខាងលើនេះដែរ។
ឯកឧត្តម ឧត្តមសេនីយ៍ឯក Damrongsak Kittiprapas បានលើកឡើងថា «ការឆបោកកូនកាត់មានរូបភាពដូចជា ជនល្មើសប្រើយុទ្ធសាស្រ្តបញ្ចុះបញ្ចូលជនរងគ្រោះឱ្យវិនិយោគលើទ្រព្យសម្បត្តិឌីជីថលតាមរយៈវេទិកាក្លែងក្លាយ BCGLOBALLTD.com បន្ទាប់មកបញ្ចុះបញ្ចូលឱ្យទិញរូបិយប័ណ្ណឌីជីថល USDT ហើយផ្ទេរទៅកាន់អាសយដ្ឋានកាបូបឌីជីថលដែលកំណត់ដោយឧក្រិដ្ឋជន»។
ឯកឧត្តម ឧត្តមសេនីយ៍ឯក Damrongsak បានបន្តថា កិច្ចសហប្រតិបត្តិការរវាងអគ្គស្នងការនគរបាលជាតិ និងសមត្ថកិច្ចពាក់ព័ន្ធក្នុងការរឹបអូសទ្រព្យសម្បត្តិពីក្រុមអ្នកឆបោក ដែលពាក់ព័ន្ធនឹងការឆបោកកូនកាត់ គឺជារឿងប្រវត្តិសាស្ត្រ។ ការបោកប្រាស់ទាំងនេះមានតម្លៃខ្ពស់បំផុតក្នុងចំណោមករណីឧក្រិដ្ឋកម្មតាមអ៊ីនធឺណិត ព្រោះក្នុងករណីនីមួយៗមានការខាតបង់មិនតិចជាង 100,000 បាតឡើយ។
លោកបានគូសបញ្ជាក់ផងដែរថា គាត់នឹងចាត់ឱ្យមេប៉ូលីសថៃ ផ្ដោតលើករណីនេះ និងករណីឆបោកតាមអ៊ីនធឺណិតផ្សេងទៀត ដូចជាករណីលួចលុយ ដែលនាំឱ្យបុគ្គលបាត់បង់ទ្រព្យសម្បត្តិយ៉ាងច្រើន។ ហើយនៅពេលមានការរឹបអូសបាន ភ្នាក់ងារនឹងប្រគល់ទ្រព្យសម្បត្តិជូនប្រជាពលរដ្ឋវិញផងដែរ៕
អត្ថបទដោយ៖ សូ សុខលី