ជាបុរសសំឡេងផ្អែមស្រទន់ រូបសង្ហាក៏ពិតមែន ប៉ុន្តែសាច់រឿងនៅពីក្រោយឆាកជីវិតលោក ថេណា ក្រោមសំឡេងសាទរដ៏កងរំពងដែលភាគច្រើនគេស្គាល់លោកតាមរយៈសំឡេងថ្នមបំពេរបទចម្រៀង Original Song ដ៏ពេញនិយមពីសំណាក់យុវវ័យភាគច្រើន។ សំនៀងឯកាប៉ុន្តែជីវិតពិតកាន់តែឯកាទៅទៀត ដោយលោកបានធ្វើការទម្លាយនូវរឿងរ៉ាវមុនចូលសិល្បៈដំបូងតែម្នាក់ឯង គ្មានអ្នកជួយជ្រោមជ្រែង មុនពេលអាចជោគជ័យលើវិថីសិល្បៈ ទទួលបានភាពល្បីល្បាញដូចពេលបច្ចុប្បន្ននេះ។
កាលពីថ្ងៃទី០២ ខែឧសភា ឆ្នាំ២០២២នេះ បុរសសំឡេងស្រទន់រូបនេះបាន ធ្វើការបង្ហោះនៅក្នុងបណ្តេញសង្គមហ្វេសប៊ុករបស់លោកថា"ឃើញរូបថតចាស់នឹកស្រណោះខ្លួនឯងកណ្ដោចកណ្ដែងតស៊ូលើវិស័យសិល្បៈមួយនេះតែម្នាក់ឯឯធ្វើគ្រប់យ៉ាងតែម្នាក់ឯងលុយក៏គ្មានកាលនិងតែអ្វីដែលខ្ញុំមាននោះគឺចំណេះដឹងផ្នែកតន្ត្រីដែលជាអ្វីដែលខ្ញុំស្រលាញ់ខំប្រឹងហាត់រៀនតាំងពីតូច កាលនៅក្មេងខ្ញុំហាត់ Guitar មួយថ្ងៃ 8 ទៅ 10 ម៉ោងជារៀងរាល់ថ្ងៃ បន្ទាប់ពីនោះខ្ញុំទៅរៀនពីកម្មវិធីធ្វើភ្លេងនិងលេងភ្លេងការ ធ្វើរឿងដដែលៗបែបនេះររហូតរាប់ឆ្នាំរហូតដល់ឆ្អឹននិងវានៅពេលដែលយើងចេះអ្វីមួយច្បាស់មិនខ្វះអ្នកត្រូវការយើងទេការងារអ្វីក៏ល្អដែរឱ្យតែយើងចេះវាច្បាស់" ។
គួរបញ្ជាក់ផងដែរថា បុរសសំឡេងផ្អែមរូបនេះ មានឈ្មោះពេញថា ខឹម ភុនថេណា កើតនៅថ្ងៃទី២០ ខែតុលា ឆ្នាំ១៩៩៤ លើទឹកដីខេត្តកោះកុង ប្រទេសកម្ពុជា។ លោកត្រូវបានគេស្គាល់ថាជាអ្នកនិពន្ធចម្រៀងដ៏មានទេពកោសល្យម្នាក់ មិនថាតាំងពីបទភ្លេង ទំនុកច្រៀង ចម្រៀងរបស់លោកនីមួយៗតែងតែសម្រិតសម្រាំង ចាក់ដោតដួងចិត្តមិត្តយុវវ័យ រហូតផ្ទុះការគាំទ្រជារឿយៗពីសំណាក់យុវវ័យ។ ក្រៅពីនោះ លោកក៏ធ្លាប់បានរៀននៅសាលាភូមិន្ទវិចិត្រសិល្បៈខាងផ្នែកតន្ត្រីរយៈពេល៣ឆ្នាំផងដែរ បូករួមជាមួយនឹងឪពុកម្តាយមានឈាមជ័រជាអ្នកសិល្បៈទៀតសោត រឹតតែធ្វើឱ្យលោកកាន់តែមានជំនាញ កាន់តែខ្លាំងលើការតែងនិពន្ធ។
តាមរយៈខ្សែជីវិតរបស់លោកថេណាបានផ្តល់គុណតម្លៃមួយដល់សង្គមថា ការដើរតាមក្ដីស្រមៃ ពេលខ្លះវាជាវិថីដ៏ឯកោបំផុតមួយ ដូច្នេះអ្នកត្រូវតែត្រៀមខ្លួនក្នុងការប្រឈមជាមួយនឹងវា។ ការចាប់ផ្ដើមដំបូងរមែងតែងតែជួបនូវការលំបាករាប់រយឧបសគ្គ ប៉ុន្តែឱ្យតែយើងមានការតាំងចិត្ត យើងប្រាកដជាអាចយកឈ្នះវាបាន រហូតអាចបោះជំហានឈានទៅដល់ការសម្រេចក្ដីស្រមៃផងដែរ។ ក្រៅពីមានក្ដីស្រមៃ អ្នកក៏ត្រូវខំប្រឹងដុសខាត់ជំនាញរបស់អ្នកឱ្យមានភាពលេចធ្លោផងដែរ ព្រោះជំនាញនឹងជួយឱ្យអ្នកអាចមានភាពលេចធ្លោកាន់តែខ្លាំង៕
អត្ថបទដោយ ពីង ជូអេង ( ត្រចៀកកាំ )
