Telegram ជាកម្មវិធីផ្ញើសារដ៏ពេញនិយមមួយ ដែលមនុស្សជាទូទាំងពិភពលោកបានប្រើប្រាស់សម្រាប់ជាមធ្យោបាយធ្វើទំនាក់ទំនងគ្នាស្ទើររាល់ថ្ងៃ មិនថាប្រើជាលក្ខណៈផ្ទាល់ខ្លួន ការងារ ឬការរកស៊ីនោះទេ ខណៈបងប្អូនក៏អាចប្រើកម្មវិធីនេះដើម្បីឆ្កឹះចំណូលផងដែរ តាមរយៈការប្រើប្រាស់ឆាណែល Telegram។

ក្នុងនោះបើតាមអ្នកផលិតមាតិកាយូធូបម្នាក់ដែលមានឈ្មោះថា Luke Mead បានបង្ហាញអំពីផ្លូវចំនួន៣ ដែលលោកអ្នកអាចធ្វើការរកចំណូលបាន ពីការប្រើប្រាស់កម្មវិធី Telegram នេះ។

១.ផ្សព្វផ្សាយ Link ផលិតផល (Affiliate Marketing)៖ ផ្លូវមួយនេះមានគេធ្វើច្រើននៅបរទេស ព្រោះថាជាទូទៅគេដាក់លក់ផលិតផលនៅលើ Website ដូចជា Amazon ជាដើម។ ហេតុនេះលោកអ្នកគ្រាន់តែយក Link ផលិតផលនោះ មកដាក់ផ្សព្វផ្សាយលើ Channel Telegram របស់អ្នក ហើយពេលដែលមានអ្នកណាចុចទិញតាម Link នោះ អ្នកនឹងទទួលបានភាគរយកម្រៃជើងសារទៅតាមចំនួនកំណត់។

២. លក់វគ្គសិក្សាអនឡាញ៖ ចំពោះវិធីសាស្រ្តនេះលោកអ្នក គ្រាន់តែបង្កើតវគ្គសិក្សា ឬកម្មវិធីចែករំលែកដែលមានគុណតម្លៃ សម្រាប់អ្នកសិក្សាឬអ្នកត្រូវ រួចហើយដាក់បញ្ចូលទៅក្នុង Channel Telegram របស់អ្នក ដោយអនុញ្ញាតឱ្យអ្នកដទៃបង់សេវា ដើម្បីបានក្លាយជាសមាជិកចូលរៀន អានឬស្តាប់​បាន​ហើយទទួលយកប្រាក់ចំណូលជាតម្លៃណាមួយដែលកំណត់បានដោយខ្លួនឯង។

៣. លក់ការផ្សាយពាណិជ្ជកម្មលើ Channel Telegram៖ ដើម្បីអាចលក់ពាណិជ្ជកម្មបាន គឺតម្រូវឱ្យអ្នកចុះឈ្មោះ Channel Telegram របស់អ្នកទៅក្នុង ការទិញដូរពាណិជ្ជកម្ម។ អ្នកផលិតមាតិកាយូធូបរូបនេះ បានណែនាំ Telega.io ដែលជាកន្លែងអ្នកអាចលក់ដាក់ពាណិជ្ជកម្មបានយ៉ាងងាយស្រួល។

គួរជម្រាបផងដែរថានាពេលថ្មីៗនេះកម្មវិធី Telegram បានបើកដំណើរការឱ្យអ្នកប្រើប្រាស់បណ្តាញសង្គមរបស់ខ្លួននៅជុំវិញពិភពលោកអាចរកលុយបានហើយ ​ឱ្យតែមានគ្រប់ទៅតាមគោលការណ៍ដែលក្រុមហ៊ុន Telegram បានកំណត់ ដោយក្នុងនោះChannel Telegram របស់លោកអ្នកត្រូវមានអ្នកតាមដានចាប់ពី១ពាន់នាក់ឡើង តេឡេក្រាមនឹងធ្វើការផ្សាយពាណិជ្ជកម្មនៅក្នុងនោះហើយចំណូលដែលបានពីការផ្សព្វផ្សាយពាណិជ្ជកម្មនឹងបានទៅដល់ម្ចាស់ Channel ម្នាក់ពាក់កណ្តាល៕

អត្ថបទដោយ៖ ពីង ជូអេង