គិតមកដល់ពេលនេះគម្រោងសាងសង់ព្រលានយន្ដហោះអន្ដរជាតិភ្នំពេញថ្មី ឬត្រូវបានដាក់ឈ្មោះថា ព្រលានយន្ដយន្ដហោះអន្ដរជាតិតេជោក្រុងតាខ្មៅ សម្រេចការសាងសង់បាន ៥០ ភាគរយហើយ ខណៈគម្រោងដំណាក់កាលទី១ គ្រោងនឹងដាក់ឲ្យដំណើរការនៅក្នុងឆ្នាំ២០២៥ ខាងមុខ។ នេះបើយោងតាមការលើកឡើងពីលោក Charles Vann នាយកក្រុមហ៊ុន Cambodia Airport Investment Co., Ltd. (CAIC) ដែលជាក្រុមហ៊ុនទទួលការសាងសង់គម្រោងនេះ។
ការលោកឡើងរបស់ប្រធានក្រុមហ៊ុនរូបនេះត្រូវបានធ្វើឡើងនៅក្នុងពិធីចុះហត្ថលេខាលើកិច្ចព្រមព្រៀងបណ្តាក់ទុនរួមគ្នា MRO (ថែទាំ ជួសជុល និងជួសជុលឡើងវិញ) នៅព្រលានអន្តរជាតិតេជោ ជាមួយក្រុមហ៊ុន SIA Engineering ដែលមានមូលដ្ឋាននៅប្រទេសសិង្ហបុរីកាលពីថ្ងៃទី៣០ ខែឧសភា ឆ្នាំ២០២៣។
ថ្លែងនៅក្នុងពិធីចុះហត្ថលេខាខាងលើលោក Charles Vann បានលើកឡើងដូច្នេះថា “បច្ចុប្បន្ននេះយើងបានបញ្ចប់ការសាងសង់បាន ៥០ ភាគរយហើយ ហើយយើងកំពុងបន្តនិងតាមដានពីរបៀបដាក់ឲ្យដំណើរការព្រលានយន្តហោះនៅដើមឆ្នាំ ២០២៥”។ នេះបើតាមការដកស្រង់ពីក្រសួងព័ត៌មាន។
សូមជម្រាបថា ក្រុមហ៊ុនសាងសង់ព្រលានយន្តហោះកម្ពុជា (CAIC) គឺជាក្រុមហ៊ុនចម្រុះបង្កើតឡើងរួមគ្នាដោយ ក្រុមហ៊ុន OCIC និងរដ្ឋលេខាធិការដ្ឋានអាកាសចរស៊ីវិលកម្ពុជា ក្នុងឆ្នាំ២០១៨ ក្រោមការណែនាំរបស់សម្តេចតេជោ ហ៊ុន សែន ដើម្បីធ្វើការងារសាងសង់ ព្រលានយន្ដអន្ដរជាតិតេជោក្រុងតាខ្មៅលើផ្ទៃដីសរុប ២៦០០០ ហិកតាមានទីតាំងនៅខេត្ដកណ្ដាល និងខេត្ដតាកែវ។
ចំពោះការងារសាងសង់វិញ ព្រលាននេះត្រូវបានបែងចែកជា ៣ ដំណាក់កាល ដោយដំណាក់កាលទី១នេះ ត្រូវបានក្រុមហ៊ុនអះអាងថា គ្រោងនឹងចំណាយថវិកា១៥០០លានដុល្លារអាមេរិ (មិនគិតបញ្ចូលតម្លៃដី) អាចនឹងទទួលបានភ្ញៀវទេសចរ ១៣លាននាក់ក្នុង១ឆ្នាំ។ ចំពោះដំណាក់កាលទី២ នឹងបញ្ចប់នៅឆ្នាំ២០៣០ អាចទទួលភ្ញៀវទេសចរ៣០លាននាក់ក្នុង១ឆ្នាំ និងដំណាក់កាលទី៣ នឹងបញ្ចប់នៅឆ្នាំ២០៥០ អាចទទួលភ្ញៀវទេសចរ ៥០លាននាក់ក្នុង១ឆ្នាំ៕
អត្ថបទ៖ កឹម ប៊ុនធឿន
