ដំណឹងរីករាយសម្រាប់អ្នកខេត្ដត្បូងឃ្មុំ ខណៈខេត្ដកូនពៅរបស់កម្ពុជាមួយនេះ ទទួលបានគម្រោងបង្កើតរោងចក្រកែច្នៃជ័រកៅស៊ូថ្មី តម្លៃប្រមាណ ៩ លានដុល្លារ ដែលវិនិយោគដោយក្រុមហ៊ុន គីមស រ៉ាប់ប៊ើរ (ខេមបូឌា) ឯ.ក។ ខណៈគម្រោងរោងចក្រថ្មីនេះ គឺមានទីតាំងស្ថិតនៅក្នុងភូមិជាំម្លូរ ឃុំរកាពប្រាំ ស្រុកត្បូងឃ្មុំ ខេត្ដត្បូងឃ្មុំ។
យោងតាមការចុះផ្សាយដោយក្រុមប្រឹក្សាអភិវឌ្ឍន៍កម្ពុជា បានឲ្យដឹងថា នៅពេលបើកដំណើរការ គម្រោងរោងចក្រកែច្នៃជ័រកៅស៊ូនេះ នឹងបង្កើតឱកាសការងារចំនួន ៤៧៥កន្លែង ជូនដល់ប្រជាពលរដ្ឋនៅក្នុងតំបន់ផងដែរ។ យ៉ាងណាគិតចាប់ពីខែមករា រហូតដល់ខែកក្កដា ឆ្នាំ២០២៥ ខេត្ដត្បូងឃ្មុំទទួលបានគម្រោងវិនិយោគថ្មីៗសរុបចំនួន ៤ ដែលមានច្រើនជាងខេត្ដជាប់របងជាមួយដូចជាខេត្ដកំពង់ចាម ខេត្ដព្រៃវែង និងខេត្ដក្រចេះជាដើម។ នេះបើយោងតាមរបាយការណរបស់ក្រុមប្រឹក្សាអភិវឌ្ឍន៍កម្ពុជាដដែល។
ក្នុងនោះដែរបើតាមការបញ្ជាក់ពីឯកឧត្តម ប៉ែន កុសល្យ អភិបាល នៃគណៈអភិបាលខេត្តត្បូងឃ្មុំ កាលពីពេលថ្មីៗកន្លងទៅបានឲ្យដឹងថា បច្ចុប្បន្ននេះ ខេត្តត្បូងឃ្មុំ មានក្រុមហ៊ុនវិនិយោគសរុបចំនួន ៣៦ក្រុមហ៊ុន ក្នុងនោះវិនិយោគរបស់រដ្ឋមានចំនួន ២ និងវិនិយោគឯកជនមានចំនួន ៣៤ក្រុមហ៊ុន។
ក្នុងចំណោមក្រុហ៊ុនទាំងនោះ មានក្រុមហ៊ុនចំនួន ១៨ ដែលផ្តោតលើវិស័យកសិកម្ម និងឧស្សាហកម្មដោយផ្តោតលើផលិតផលសំខាន់ៗដូចជា អង្ករ ដំឡូងមី ស្វាយចន្ទី អំពៅ និងកៅស៊ូ ព្រមទាំងការកែច្នៃផ្លែឈើ ជាពិសេសចេក និងការដាំដុះម្រេច។ បន្ថែមពីលើនេះ មានក្រុមហ៊ុនចំនួន ៦ មានជំនាញក្នុងការកែច្នៃជ័រកៅស៊ូ ខណៈក្រុមហ៊ុន ១ កំពុងធ្វើសកម្មភាពរុករករ៉ែ។ ដោយឡែក ក្រុមហ៊ុនចំនួន១១ទៀត វិនិយោគលើវិស័យផ្សេងៗ ដូចជា៖ ផ្សារ សណ្ឋាគារ ទុយោកែច្នៃ ប្លាស្ទិក ថាមពល ចំណីសត្វ កាត់ដេរសម្លៀកបំពាក់ និងស្បែកជើង៕
