ជាដំណឹងល្អសម្រាប់អ្នកខេត្ដតាកែវ ខណៈនៅពាក់កណ្ដាលខេត្ដតុលា ឆ្នាំ២០២៥ ខេត្ដដែលកំពុងមានសក្ដានុពលមួយនេះ ទទួលបានគម្រោងវិនិយោគចំនួន ៣ ដែលមានទុនវិនិយោគសរុបជាង ២០ លានដុល្លារ និងអាចបង្កើតឱកាសការងារបានជាង ១ ពាន់កន្លែង ជូនពលរដ្ឋនៅក្នុងតំបន់ផងដែរ។ យោងតាមការចេញផ្សាយដោយក្រុមប្រឹក្សាអភិវឌ្ឍន៍កម្ពុជា គម្រោងថ្មីទាំង ៣ នេះរួមមាន៖ 

១. រោងចក្រផលិតអេប៉ុង ដែលមានទីតាំងស្ថិតនៅក្បាលដីលេខ ១២០៤ ផ្លូវជាតិលេខ២ ភូមិជួស ឃុំជីខ្លា ស្រុកទ្រាំង ខេត្ដតាកែវ។ គម្រោងនេះត្រូវបានវិនិយោគដោយក្រុមហ៊ុន TRIDENT NEW MATERIAL TECHNOLOGY CO., LTD. មានទុនសរុបចំនួន ១០,២ លានដុល្លារ និងអាចបង្កើតការងារបានចំនួន ១៨៧កន្លែង។

២. រោងចក្រផលិតគ្រឿងសង្ហារិមគ្រប់ប្រភេទ ដែលមានទីតាំងស្ថិតនៅភូមិវៀង ឃុំតាំងដូង ស្រុកបាទី ខេត្ដតាកែវ។ រោងចក្រនេះត្រូវបានវិនិយោគដោយក្រុមហ៊ុន OVERSEA FURNITURE PRODUCTS (CAMBODIA) CO.,LTD. មានទុនសរុបចំនួន ៥,៧លានដុល្លារអាម៉េរិក និងអាចបង្កើតការងារបានចំនួន ៥៤៩កន្លែង។

៣. រោងកច្រផលិតបរិក្ខារអគ្គិសនីបំភ្លឺ និងគ្រឿងបន្ទាប់បន្សំ ដែលមានទីតាំងស្ថិតនៅអគារលេខ ៥ ភូមិរកាពក ឃុំត្រពាំងក្រសាំង​ ស្រុកបាទី ខេត្ដតាកែវ។ រោងចក្រនេះត្រូវបានវិនិយោគដោយក្រុមហ៊ុន EDI LIGHTING (CAMBODIA) CO., LTD. មានទុនវិនិយោគសរុបចំនួន ៥,៣លានដុល្លារអាម៉េរិក និងអាចបង្កើតការងារបានចំនួន ៣៥៣កន្លែង។

គួរជម្រាបផងដែរនៅក្នុងរយៈពេល ៩ ខែ ឆ្នាំ២០២៥ នេះ ខេត្ដតាកែវ ទទួលបានគម្រោងវិនិយោគសរុបចំនួន ៥៩ គម្រោង និងឈរចំណាត់ថ្នាក់ទី៤ ជាខេត្ដទទួលបានគម្រោងវិនិយោគច្រើនជាងគេបន្ទាប់ពី កំពង់ស្ពឺ ស្វាយរៀង និងរាជធានីភ្នំពេញ៕