កាលពីពេលថ្មីៗនេះ ផ្ទុះការចាប់អារម្មណ៍ខ្លាំងលើវត្តមានតារារ៉េបជួរមុខកម្ពុជាលោក វណ្ណដា ប៉ះជាមួយកញ្ញា Rock Star ឈ្មោះ Suboi ច្រៀងរួមគ្នាបង្កើតជាទសនីយភាពដ៏កម្រកក្រើកឆាកកម្មវិធីនៅវៀតណាម។ ចុះតើនារីម្នាក់នេះមានប្រវត្តិបែបណា?
កញ្ញា Suboi (Hàng Lâm Trang Anh) កើតថ្ងៃទី១៤ ខែមករា ឆ្នាំ១៩៩០ លើទឹកដីទីក្រុងហូជីមិញ ប្រទេសវៀតណាម ក្នុងគ្រួសារជីវភាពបង្គួរមួយ ដោយមានម្តាយជាបុគ្គលិកនៅស្ថានកុងស៊ុលអូស្ត្រាលី និងមានឪពុកជាអ្នកគ្រប់គ្រងរោងចក្រ។ បច្ចុប្បន្ននាងគឺជាតារាចម្រៀងដ៏មានប្រជាប្រិយភាពបំផុតក្នុងប្រទេសកំណើត និងជាបុគ្គលមួយរូបមានទ្រព្យសម្បត្តិច្រើនជាងគេក្នុងវិស័យសិល្បៈផងដែរ។
ត្រឡប់ទៅកាន់អតីតកាល Suboi ធ្លាប់ជាមនុស្សមានភាពអៀនខ្មាស ចូលចិត្តចំណាយពេលច្រើនលើពាក្យសម្ដី និងតែងកំណាព្យគួរឲ្យអស់សំណើចតាមអារម្មណ៍របស់នាង។ លុះឈានចូលដល់វ័យ១៥ឆ្នាំ Suboi បានសម្រេចចិត្តជ្រើសរើសយកអាជីពតន្ត្រី និងបានទទួលយកការអញ្ជើញឱ្យចូលរួមក្នុងក្រុមតន្ត្រី nu-metal ដែលគ្របដណ្តប់បទចម្រៀង Linkin Park ហើយបានក្លាយទៅជាអ្នករ៉េបដែលមានការទទួលស្គាល់ និងគោរពយ៉ាងឆាប់រហ័សក្នុងប្រទេសវៀតណាម។
ការធ្វើដំណើរយ៉ាងរដេបរដុបលើវិថីរ៉េបរយៈពេល៥ឆ្នាំ ក្នុងនាមជាស្ត្រីពិតជាមិនងាយស្រួលឡើយសម្រាប់ Suboi ទាំងគ្រួសារ និងទស្សនិកជន យល់ឃើញថាការរ៉េបគឺមានតែបុរសប៉ុណ្ណោះ ហើយវាគឺជាបញ្ហាប្រឈមដ៏ធំចំពោះតារារ៉េបស្រីវៀតណាមដំបូងគេរូបនេះ។ ប៉ុន្តែមិនថ្វី ក្នុងវ័យ២០ឆ្នាំ នាងបានចេញអាល់ប៊ុមដំបូងរបស់ខ្លួន WALK ក្នុងខែសីហា ឆ្នាំ២០១០ និងផ្ទុះការគាំទ្រជាខ្លាំង។
ក្រោយឈប់ពីក្រុមហ៊ុន Music Faces ក្នុងឆ្នាំ២០១២ នាងបានចាប់ផ្តើមក្រុមហ៊ុនផ្ទាល់ខ្លួនឈ្មោះ Suboi Entertainment ហើយបានចេញអាល់ប៊ុមស្ទូឌីយោទីពីរ ដែលមានចំណងជើងថា RUN ក្នុងឆ្នាំ២០១៤។ អាល់ប៊ុមនេះមានបទចម្រៀងដែលផលិតដោយផលិតករវៀតណាមក្នុងស្រុក ក៏ដូចជាសិល្បករអន្តរជាតិនៅសហរដ្ឋអាមេរិក និង ប្រទេសអង់គ្លេសថែមទៀត។
ក្នុងឆ្នាំ២០១៥ Suboi ត្រូវបានគេអញ្ជើញឱ្យធ្វើបទបង្ហាញជាផ្លូវការក្នុងអំឡុងពេលកម្មវិធី South by Southwest (SXSW) និងបានក្លាយជាសិល្បករវៀតណាមដំបូងគេដែលបានទទួលការអញ្ជើញពីមហោស្រពនេះ។ មិនតែប៉ុណ្ណោះ នៅថ្ងៃទី២៥ ខែឧសភា ឆ្នាំ២០១៦ កញ្ញា Suboi ផ្ទុះការចាប់អារម្មណ៍ពីប្រព័ន្ធផ្សព្វផ្សាយអន្តរជាតិភ្លាមៗ បន្ទាប់ពីបានរ៉េបជូនអតីតប្រធានាធិបតីអាមេរិក Barack Obama ក្នុងវគ្គ Q&A ជាមួយមេដឹកនាំវ័យក្មេងនៅទីក្រុងហូជីមិញ។ គ្រានោះហើយដែលធ្វើឲ្យប្រជាប្រិយភាពរបស់កញ្ញារីកសាយភាយកាន់តែទូលំទូលាយទៅកាន់ពិភពលោករហូតមកទល់បច្ចុប្បន្ន។
គួរជម្រាបផងដែរថា រាជនីនៃវិស័យហ៊ីបហបវៀតណាម វ័យ៣៣ឆ្នាំ Suboi ពុំទាន់មានដៃគូជីវិតនៅឡើយទេ និងត្រូវបានគេប៉ាន់ស្មានថាមានទ្រព្យសម្បត្តិប្រមាណ ៥លានដុល្លារ គិតត្រឹមពាក់កណ្តាលឆ្នាំ២០២៣ ចេញផ្សាយដោយគេហទំព័រ All Famous Birthday។ ក្នុងនាមជាកំពូលតារារ៉េបមួយរូប Suboi បានលើកឡើងយ៉ាងដូច្នេះថា៖ «ធាតុសំខាន់ៗដែលធ្វើឲ្យអ្នករ៉េបជោគជ័យគឺ មិនត្រូវបោះបង់ ស្តាប់មតិអ្នកដទៃ ទទួលយកដំបូន្មាន និងបន្តរៀនសូត្រឥតឈប់ឈរ»៕
អត្ថបទដោយ៖ កាន់ ដារ៉ា (ស្មេរពនេចរ) ម្ចាស់ស្នាដៃសៀវភៅ «ច្រវាក់ប្រាក់ខែ»
ចែករំលែកគំនិត ឬផ្សព្វផ្សាយអាជីវកម្មអ្នកទីនេះ សូមទំនាក់ទំនង ០៩៦ ៤៩៩ ៧៣ ៦៦
