ប្រសិនបើអ្នកកំពុងតានតឹង មានអារម្មណ៍មិនស្រឡះ ខួរក្បាលកំពុងគិតដោយគ្មានសណ្តាប់ធ្នាប់នោះ ទោះជាខំអង្គុយគិតយ៉ាងណាក៏នឹងទទេស្អាតដែរ។
យ៉ាងណាមិញបើតាមបទពិសោធន៍របស់បិតាស្ថាបនិក Apple លោក Steve Jobs ដែលកាលពីលោកនៅមានជីវិត លោកជាមនុស្សធ្វើការខ្លាំង ពលីក្នុងការងារ ក៏លោកធ្លាប់ជួបបញ្ហាគិតអ្វីមិនចេញ និងមានភាពតានតឹងដូចគ្នាដែរ។
ដូច្នេះតាមការចុះផ្សាយរបស់ទស្សនាវដ្តី Inc ដកស្រង់អំពីសៀវភៅជីវប្រវត្តិ “Steve Jobs” ជាស្នាដៃនិពន្ធរបស់លោក Walter Isaacson បានឱ្យដឹងថា Jobs គឺជាមនុស្សដែលងប់ងុលនឹងការងារ ប៉ុន្តែនៅអំឡុងពេលដែលគាត់កំពុងរវល់ខ្លាំង និងមានភាពតានតឹងដល់កម្រិតកំពូល នៅក្នុងការិយាល័យរបស់គាត់ៗតែងចាយពេល១០នាទីដើរចេញឱ្យឆ្ងាយពីតុធ្វើការ។
មិនត្រឹមតែប៉ុណ្ណោះច្បាប់១០នាទីនេះ Jobs បង្កើតការដើរឬរត់ដែលធ្វើឱ្យសរសៃប្រសាទ ខួរក្បាលរបស់គាត់ដំណើរការបានប្រសើរជាងមុនបន្តិច។
ក្នុងនោះអ្នកជំនាញខាងសរសៃប្រសាទដែលទទួលការបណ្តុះបណ្តាលពីសាកលវិទ្យាល័យ Cambridge និងជាអ្នកនិពន្ធសៀវភៅ Hyper efficient បានណែនាំឱ្យយើងទាំងអស់គ្នាធ្វើដូច Jobs ហើយអនុវត្តតាមច្បាប់រយៈពេល ១០នាទី ជំនួសឱ្យការអង្គុយមួយកន្លែងពេលដែលគិតអ្វីមិនចេញ។
ជាការពិតណាស់ការដោះស្រាយបញ្ហាផ្លូវចិត្តតាមរយៈ ការព្យាយាមប្រើច្បាប់១០នាទី ដោយក្រោកឈរឡើងចេញពីតុធ្វើការហើយដើរលេង គឺជាវិធីបង្កើនប្រសិទ្ធភាពខួរក្បាលរបស់អ្នកតាមរយៈការបន្លាស់ទី ដែលវាជារបៀបមួយធ្វើឱ្យខួរក្បាលមនុស្សប្តូររបៀបធ្វើការ ពីព្រោះការងារមមាញឹកមានជាប្រចាំ ដូច្នេះការផ្តោតអារម្មណ៍របស់ខួរក្បាលក៏មានការឡើងចុះគឺជារឿងធម្មតានោះទេ ហេតុនេះចូរកុំតានតឹងពេក៕
អត្ថបទដោយ៖ ពីង ជូអេង