អ្នកឧកញ៉ា សុខ គង់ ត្រូវបានគេស្គាល់ថា ជាមហាសេដ្ឋីដ៏ល្បីឈ្មោះមួយរូបនៅកម្ពុជាដែលក្តោបក្តាប់ជំនួញរាប់លានដុល្លារលើវិស័យអចលនទ្រព្យ។ ជាមួយនឹងភាពជោគជ័យដ៏ធំធេងនេះ មិត្តអ្នកអានប្រហែលជាចង់ដឹងហើយថា តើមុខជំនួញដំបូងរបស់អ្នកឧកញ៉ាមានអ្វីខ្លះ? និងចាប់ផ្តើមដោយរបៀបណា?
សហគ្រិនចាស់វស្សាវ័យ៧០ឆ្នាំ អ្នកឧកញ៉ា សុខ គង់ គឺជាអតីតកូនអ្នកនេសាទ និងធ្លាប់រកស៊ីជួញដូរផលនេសាទ តាមដងទន្លេមេគង្គ ក្នុងខេត្តព្រៃវែង។ ក្រោយថ្ងៃទី៧ ខែមករា ឆ្នាំ១៩៧៩ ភ្លើងសង្គ្រាមបានលុតផុតទៅ គ្រួសារលោកបានផ្លាស់ទីលំនៅមករស់នៅ ខណ្ឌច្បារអំពៅ រាជធានីភ្នំពេញវិញ ជាមួយដើមទុនមាស ១ជីកន្លះ។ ស្នាក់នៅក្នុងផ្ទះតូចចង្អៀតមួយកន្លែងនៅម្តុំផ្សារស៊ីលិប លោកនិងភរិយា បានចាប់ផ្តើមប្រកបរបរកិនកៅស៊ូ ធ្វើសម្បកកង់ឡានលក់ទៅប្រទេសវៀតណាម ដោយដឹងថា ប្រទេសវៀតណាមកំពុងមានតម្រូវការខ្ពស់។ មុខរបរអ្នកទាំងពីរចេះតែពង្រីកខ្លួនពីមួយថ្ងៃទៅមួយថ្ងៃ ទិញអស់ដើមទុន១ជី លក់បាន ១តម្លឹង មានការបញ្ជាទិញពីអតិថិជនកាន់តែច្រើនឡើងៗ។ គ្រានោះ លោកក៏បានផលិតស្បែកជើងកង់ឡាន តបតាមការកម្មង់រាប់ម៉ឺនគូសម្រាប់កងទ័ពផងដែរ។
អ្នកឧកញ៉ា សុខ គង់ បានផ្តល់ជាទស្សនថា៖ «យើងប្រកបមុខរបរអ្វីក៏ដោយ ត្រូវចុះជាប់វាជានិច្ច ដើម្បីរៀនសូត្រពីវាផង ធ្វើឱ្យវាទៅមុខផង។ ការងារណាដែលខ្ញុំធ្វើវាហើយ ខ្ញុំមិនបោះបង់វាទេ ត្រូវតែប្រឹងធ្វើឱ្យបាន ជូនកាលខ្ញុំនឹកឃើញម៉ោងបីទាបភ្លឺ ក៏ខ្ញុំឡើងធ្វើដែរ ខ្ញុំប្រឹងប្រែងតស៊ូណាស់ ធ្វើអានេះ មិនបាន ខ្ញុំទៅធ្វើអានោះ ធ្វើទាល់តែបាន»។
បើតាមអ្នកឧកញ៉ា សុខ គង់ នាសម័យនោះ សម្បកកង់ផលិតនៅវៀតណាមមានគុណភាពអន់ ដែលគេតែងបង្អាប់ថា របស់ទ្រឿង ធ្វើឱ្យអ្នកប្រើប្រាស់មានការខ្លាចរអារក្នុងការទិញ។ ដោយសិប្បកម្មដំណើរការល្អ ពេលនោះលោកបានពង្រីកទីតាំងជាច្រើនកន្លែង ជាបន្តបន្ទាប់។ ក្រោយទទួលបានជោគជ័យក្នុងការផលិតកៅស៊ូអ៊ុតសម្បកកង់រួចមក លោកបានស្រាវជ្រាវ ផលិតនូវសម្ភារៈពីជ័យមួយចំនួនផ្សេងទៀត ដូចជាស្បែកជើងជាដើម។
ពីមួយដំណាក់កាលទៅមួយដំណាក់កាល ប្រទេសចេះតែមានការរីកចម្រើន ការធ្វើជំនួញរបស់អ្នកឧកញ៉ា សុខ គង់ រីកលូតលាស់ឥតឈប់ឈរ ដោយបានពង្រីកអាជីវកម្មធំៗជាបន្តបន្ទាប់រហូតដល់បច្ចុប្បន្ន។ ក្នុងនោះ អ្នកឧកញ៉ា សុខ គង់ បានក្តោបក្តាប់មុខជំនួញជាច្រើន នៅក្រោមក្រមហ៊ុន សូគីម៉ិច អ៊ិនវេសមេន គ្រុប រួមមាន៖ ក្រុមហ៊ុន សុខា អាហរ័ណ នីហរ័ណ (ធ្វើអាជីវកម្មនាំចូល និងចែកចាយផលិតផលប្រេងឥន្ធនៈ ហ្គាស កៅស៊ូក្រាលថ្នល់), ក្រុមហ៊ុនហ៊ុន គង់ហុង កាត់ដេរ, ក្រុមហ៊ុនវិនិយោគទុន សូគីម៉ិច កម្ពុជា, ក្រុមហ៊ុន សុខា អូតែល, សណ្ឋាគារសុខាឆ្នេរ ក្រុងព្រះសីហនុ, សណ្ឋាគារ សុខាអង្គរ, សណ្ឋាគារសុខាសៀមរាប, សណ្ឋាគាររេស៊ីដង់ភ្នំពេញ, សណ្ឋាគាររមណីយដ្ឋានឋានសួគ៌សុខា, ក្រុមហ៊ុនបូកគោហ្វាម, ក្រុមសុខារៀលអ៊ីស្តេត, ក្រុមហ៊ុនជោរៃភ្នំពេញយ៉ញវេនឈ័រ ខូ អិល ធីឌី និងក្រុមហ៊ុន សុខ គង់ អាហរ័ណ នីហរ័ណ(គិរីរម្យ) ជាដើម។
យ៉ាងណាមិញ អ្នកឧកញ៉ាបានមានប្រសាសន៍ជំរុញទឹកចិត្ត យ៉ាងដូច្នេះថា៖ «កំាបិតទោះបីជាមិនមុត តែបើសំលៀងរាល់ថ្ងៃ ច្បាស់ជាមុត តស៊ូកុំបោះបង់» [ ] «ពីដើមឡើយគ្រូទាយក៏មិនជឿ ស្អីក៏មិនជឿ គឺជឿជាក់លើខ្លួនឯង គិតខ្លួនឯង ដើម្បីការងារអភិវឌ្ឍ»។ អ្នកឧកញ៉ាបានបន្ថែមទៀតថា៖ «ជាអ្នកដឹកនាំគេកុំចង្អៀតចង្អល់ត្រូវចិត្តទូលាយតែកុំទូលាយហួសហេតុពេកខ្ជីខ្ជាពេកក៏មិនកើតដែរ»។ នេះបើយោងតាមការឲ្យដឹងពីគេហទំព័រ សុខាអចលនទ្រព្យ Sokha Real Estate៕
អត្ថបទដោយ៖ កាន់ ដារ៉ា (ស្មេរពនេចរ) ម្ចាស់ស្នាដៃសៀវភៅ «ច្រវាក់ប្រាក់ខែ»
ចែករំលែកគំនិត ឬផ្សព្វផ្សាយអាជីវកម្មអ្នកទីនេះ សូមទំនាក់ទំនង ០៩៦ ៤៩៩ ៧៣ ៦៦
