រាជរដ្ឋាភិបាលតាមរយៈក្រសួងសាធារណការ និងដឹកជញ្ចូន បានប្រកាសថានឹងធ្វើការសាងសង់ផ្លូវថ្មី១ខ្សែនៅក្នុងខេត្ដសៀមរាប ដោយតភ្ជាប់ពីព្រលានយន្ដហោះថ្មី (ព្រលានយន្ដហោះអន្ដរជាតិសៀមរាប-អង្គរ) មកកាន់ផ្លូវជាតិលេខ ៦ ។ ដោយផ្លូវថ្មីនេះនឹងសាងសង់ពី ៤ ទៅ ៦ គន្លង ដើម្បីឲ្យមានភាពងាយស្រួលនៅក្នុងការធ្វើដំណើរ។
តាមការប្រសាសន៍របស់ឯកឧត្ដមទេសរដ្ឋមន្រ្ដី ស៊ុន ចាន់ថុល រដ្ឋមន្រ្ដីក្រសួងសាធារណការ និងដឹកជញ្ជូន នៅសន្និសីទសារព័ត៌មាន ស្ដីពី “សមិទ្ធផលសម្រេចបានរយៈពេល ៥ឆ្នាំកន្លងមក របស់ក្រសួង” កាលពីពេលកន្លងទៅនេះបានឲ្យដឹងថា ផ្លូវថ្មីនេះគឺមានប្រវែងសរុប ១៩ គីឡូម៉ែត្រ ខណៈបច្ចុប្បន្នត្រូវបានធ្វើការសិក្សាចប់សព្វគ្រប់ហើយ។
ថ្លែងក្នុងឱកាសនោះឯកឧត្ដមទេសរដ្ឋមន្រ្ដីបានលើកឡើងយ៉ាងដូច្នេះថា «យើងកំពុងសាងសង់ព្រលានយន្ដហោះថ្មីមួយនៅសៀមរាប អ៊ីចឹងត្រូវមានផ្លូវតភ្ជាប់ពីព្រលានយន្ដហោះថ្មីមកផ្លូវលេខ ៦ របស់យើង។ ប៉ុន្ដែបើមកផ្លូវលេខ ៦ វាអាចកដប អ៊ីចឹងយើងបានសិក្សាចប់ហើយ ពីផ្លូវហ្នឹងទៅសៀមរាបពង្រីកវាទៅ៤ គន្លង កន្លែងខ្លះ ៦ គន្លង ១៩ គីឡូម៉ែត្រ អ៊ីចឹងនឹងបើកការចរចាឆាប់ៗនេះ»។
សូមជម្រាបផងដែរថា ក្រៅពីគម្រោងផ្លូវដ៏ធំនេះ ខេត្ដសៀមរាបក៏មានផ្លូវដ៏ធំមួយខ្សែរួចមកហើយផងដែរ ដែលមានទំហំ ៨ គន្លង និងត្រូវបានចាត់ទុកថាជាផ្លូវធំជាងគេនៅក្នុងប្រទេសកម្ពុជា៕
អត្ថបទ៖ កឹម ប៊ុនធឿន