មិនត្រឹមតែមានរូបរាងសង្ហានិងមានមុនស្នេហ៍ប៉ុណ្ណោះទេ កីឡាករសម្បុរខ្មៅស្រអែម សុិន សុវណ្ណមករា ក៏ត្រូវបានអ្នកគាំទ្រភាគច្រើនចាត់ទុកថាជាខ្សែការពារ U22 ដ៏ឆ្នើមបំផុតមួយរូបប្រចាំប្រទេសកម្ពុជាផងដែរ ដោយជាក់ស្តែងកាលពីថ្មីៗនេះកម្ពុជាបានទាត់ប៉ះនឹងឥណ្ឌូនេសុី ដោយខ្សែរការពារ សុិន សុវណ្ណមករា បានទាត់១គ្រប់បញ្ចូលទីយ៉ាងជោគជ័យ ដោយធ្វើឱ្យហ្វេនៗ ស្រែកពេញកីឡដ្ឋាន។
ជាមួយគ្នានេះដែរ ប្រិយមិត្តមួយចំនួនប្រហែលជាធ្លាប់បានដឹងច្រើនមកហើយទាក់ទងពីអាជីព និងសមត្ថភាពរបស់គាត់ ប៉ុន្តែប្រិយមិត្តប្រហែលជាមិនទាន់ដឹងទេថា ស៊ិន សុវណ្ណមករា អាចជាប់ជម្រើសជាតិដូចសព្វថ្ងៃនេះ តើមានអ្វីជាកម្លាំងចិត្ត?
ថ្លែងនៅក្នុងបទសម្ភាសជាមួយក្លឹបបាល់ទាត់ Visakha FC ម្តាយរបស់កីឡាករ សុិន សុវណ្ណមករា បានមានប្រសាសន៍ថា អ្នកស្រីតែងតែលើកទឹកចិត្តកូនរបស់អ្នកស្រីជាប្រចាំថា “ កូនត្រូវតែខំប្រឹង ខំឱ្យអស់ពីសមត្ថភាព ខំប្រឹងប្រជែង ដើម្បីអាចយកដំណែងមួយនៅក្នុងជម្រើសជាតិ” អ្នកស្រីនិយាយទាំងមានមោទនភាព និងសប្បាយចិត្តជាខ្លាំងដែលទីបំផុតកូនប្រុសរបស់អ្នកស្រីអាចធ្វើបាន។
ស្របគ្នានេះដែរ សុិន សុវណ្ណមករា បានលើកឡើងផងដែរថា “ទាំងឪពុកទាំងម្តាយ និងបងប្រុសរបស់លោកបានជម្រុញរូបលោកជាខ្លាំង ឱ្យខំប្រឹងប្រែងហ្វឹកហាត់”។ លើសពីនេះអ្វីដែលកាន់តែពិសេសជាងនេះទៅទៀតនោះលោកមានបងប្រុសជួយបង្ហាត់រូបលោកទាំងពីលោកនៅតូច។
គួរជម្រាបផងដែរថា សុិន សុវណ្ណមករា បានចាប់អាជីពជាអ្នកបាល់ទាត់នេះអំឡុងឆ្នាំ២០១៤ ដោយបច្ចុប្បន្នហ្វឹកហាត់ក្នុងក្លឹបវិសាខា ហើយកាលពីមិនទាន់បានចូល U22 លោកបានចូលហ្វឹកហាត់ក្នុងក្លឹបភ្នំពេញក្រោនដូចទៅនឹងបងប្រុសរបស់លោកដែរ គឺកីឡាករ សុិន កក្កដា៕
