បន្ទាប់ពីសាងសង់យ៉ាងមមាញឹកអស់រយៈពេល៣ឆ្នាំ ទីបំផុតព្រលានយន្តហោះអន្តរជាតិសៀមរាប-អង្គរ ដែលមានតម្លៃ១ពាន់លានដុល្លារ បានតេស្តសាកល្បងហោះហើរដោយជោគជ័យ។ នេះបើយោងតាមរយៈវីដេអូ របស់សហភាពសហព័ន្ធយុវជនកម្ពុជារាជធានីភ្នំពេញ កាលពីថ្ងៃទី១៤ ខែឧសភា ឆ្នាំ២០២៣ កន្លងទៅនេះ។
យោងតាមវីដេអូរយៈពេល៣៦ វិនាទី ដែលបង្ហោះដោយ សហភាពសហព័ន្ធយុវជនកម្ពុជារាជធានីភ្នំពេញ ដែលមានចំណងជើងថា "ការធ្វើតេស្តសាកល្បងហោះហើរ នៅអាកាសយានដ្ឋានអន្តរជាតិសៀមរាបអង្គរ" ការហោះហើរតេស្តសាកល្បងនេះគឺប្រើប្រាស់យន្តហោះខ្នាតតូច បានធ្វើការហោះហើរ ក្នុងលំហរអាកាសជុំវិញព្រលានយន្ត និងបានចុះចត ដោយសុវត្ថិភាព។
យ៉ាងណាមិញតាមការបញ្ជាក់ពី ឯកឧត្តម តឹករ៉េត សំរេច រដ្ឋមន្រ្តីប្រតិភូអមនាយករដ្ឋមន្រ្តី និងជាប្រធាន គណៈកម្មការតម្រង់ទិសសម្រាប់ការសាងសង់ព្រលានយន្តហោះនេះ កាលពីថ្ងៃទី២០ មេសា កន្លងទៅ ឯកឧត្តម បានឱ្យដឹងថា ក្រោយពីតេស្តសាកល្បងហោះហើរនេះរួច ព្រលានយន្តហោះអន្តរជាតិសៀមរាប-អង្គរ នឹងត្រូវបើកដំណើរការជាផ្លូវការនៅក្នុងខែ តុលា ឆ្នាំ២០២៣ ខាងមុខ។
សូមជម្រាបផងដែរថា ព្រលានយន្តហោះអន្តរជាតិសៀមរាបអង្គរ ត្រូវបានអនុវត្តន៍ការសាងសង់ដោយក្រុមហ៊ុន Angkor International Airport Investment (Cambodia) Co.,Ltd (AIAI) ក្រោមទុនវិនិយោគប្រមាណ ១ពាន់លានដុល្លារ។
ព្រលានយន្តហោះអន្ដរជាតិថ្មីនេះ មានទីតាំងស្ថិតនៅក្នុងឃុំតាយ៉ែក ស្រុកសូទ្រនិគម មានចម្ងាយប្រមាណជា៥១គីឡូមែត្រពីក្រុងសៀមរាប និងប្រហែលជា៤០គីឡូម៉ែត្រពីប្រាសាទអង្គវត្គ បានចាប់ផ្ដើមដំណើរការសាងសង់កាលពីថ្ងៃទី ១៥ ខែមីនា ឆ្នាំ ២០២០ លើផ្ទៃដីទំហំ ៧០០,០៦ហិកតា និងបែងចែកជា ៣ ដំណាក់កាល។
យោងតាមរបាយការណ៍ ព្រលានយន្ដហោះអន្តជាតិសៀមរាប-អង្គរ គឺស្ថិតក្នុងលំដាប់4E មានផ្លូវរត់ប្រវែង៣,៦០០ម៉ែត្រ ទទឹង ៤៥ម៉ែត្រ មាន៣៨ចំណតយន្តហោះ និងមានក្រឡាផ្ទៃស្ថានីយ អ្នកដំណើរជាង ៨ម៉ឺនម៉ែត្រក្រឡា ដែលអាចទទួលអ្នកដំណើរជាប្រចាំឆ្នាំប្រមាណជា ៧លាននាក់៕
អត្ថបទដោយ៖ ឌឿក ស្រីនុត
