ក្នុងថ្ងៃឡើងទទួលពានរង្វាន់ Inspirational Women Hall of Fame ពីកម្មវិធី HOFS AWARDS 2024 (Hall of Fame in Singapore 2024) ដែលប្រារព្ធឡើងកាលពីថ្ងៃទី២៥ ខែឧសភា ឆ្នាំ២០២៤ នៅប្រទេសសិង្ហបុរី តារាសម្តែងស្រី ស៊ីន យូប៊ីន បានប្រាប់ភ្ញៀវក្នុងពិធីដែលសុទ្ធសឹងជាវិនិយោគិនល្បីៗមកពីបណ្តាប្រទេសផ្សេងៗថា កុំមើលរំលង ក្នុងការមកបណ្តាក់ទុន នៅប្រទេសកម្ពុជា។
ខណៈដៃកំពុងកាន់ពានរង្វាន់ កញ្ញា ស៊ីន យូប៊ីន ដែលជាតារាសម្តែងឆ្នើមលំដាប់ប្រទេសកម្ពុជា បានលើកឡើងយ៉ាងដូច្នេះថា៖ «ប្រសិនអ្នកចង់ពង្រីកមុខជំនួញសូមកុំមើលរំលងប្រទេសកម្ពុជាឲ្យសោះ។ ហេតុអ្វី? ពីព្រោះបើទោះកម្ពុជាជាប្រទេសតូចក្តី តែយើងមានសក្កានុពល និងមានបេះដូងធំ ហើយស្ថិតក្រោមការដឹកនាំដ៏ឈ្លាសវៃរបស់ប្រមុខរាជរដ្ឋាភិបាល។ ក្នុងនោះយើងបង្កើតបានសមិទ្ធផលដ៏ល្អក្នុងពេលដ៏ឆាប់រហ័ស»។
កញ្ញាបានបន្ថែមទៀតថា៖ «កម្ពុជាមិនដែលភ័យខ្លាចក្នុងការចូលរួមបោះជំហានឆ្ពោះទៅមុខឥតឈប់ឈរ មិនថាស្ថិតក្នុងស្ថានភាពណាមួយឡើយ ដូច្នេះទើបយើងបង្កើតឱ្យមានពាក្យស្លោកមួយថា “ខ្មែរធ្វើបាន” ជាចំណុចដែលធានាថា ការវិនិយោគនៅកម្ពុជា ពិតជាទទួលបានលទ្ធផល ឈ្នះ-ឈ្នះ ជាក់ជាមិនខាន»។
គួរជម្រាបផងដែរថា នេះមិនមែនលើកដំបូងទេ ដែលតារាសម្តែងឆ្នើម ស៊ីន យូប៊ីន ទទួលបានពានរង្វាន់ពីកម្មវិធី «HOFS AWARDS 2024» ព្រោះកញ្ញាធ្លាប់ទទួលបានពានរង្វាន់នេះម្តងហើយ កាលពីឆ្នាំ២០២៣ កន្លងទៅ។ ក្នុងឱកាសនោះ កញ្ញាបានប្រើប្រាស់សំឡេងរបស់ខ្លួន ផ្សព្វផ្សាយពីវិស័យទេសចរណ៍របស់កម្ពុជា ដោយបានលើកឡើងពីតំបន់ទេសចរណ៍ ភាពរួសរាយរាក់ទាក់របស់ប្រជាជនខ្មែរ និងបានជំរុញលើកទឹកចិត្តភ្ញៀវទេសចរ ឱ្យមកកម្សាន្តនៅកម្ពុជា យ៉ាងហោចណាស់ម្តងក្នុងជីវិត៕
អត្ថបទដោយ៖ កាន់ ដារ៉ា
