នៅប៉ុន្មានថ្ងៃចុងក្រោយនេះ ពលរដេ្ឋខ្មែរយើងមានការព្រួយបារម្ភ បន្ទាប់ពីធនាគារនៅសហរដ្ឋអាមេរិកបានដួលរលំជាបន្ទាប់ ដូច្នេះពួកគាត់មានការភ័យខ្លាចបញ្ហានេះរាលដាលដល់ប្រព័ន្ធធនាគារនៅកម្ពុជាដែលនាំឲ្យខាតបង់លុយដែលពួកគាត់ដាក់ក្នុងធនាគារនៅកម្ពុជា។

ទាក់ទងនឹងបញ្ហាដួលរលំធនាគារនៅអាមេរិក នៅក្នុងកម្មវិធីប្រគលសញ្ញាបត្រជូននិស្សិតសាកលវិទ្យាល័យ BBU សម្ដេច តេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាបានអំពាវនាវដល់ពលរដ្ឋដែលដាក់លុយនៅធនាគារថាសូមកុំមានការស្លន់ស្លោរ។

 សម្ដេច ហ៊ុន សែនបានមានប្រសាសន៍បញ្ជាក់ថា” ខ្ញុំសូមអំពាវនាវចំពោះប្រជាពលរដ្ឋ ដែលដាក់លុយនៅធនាគារ សូមកុំស្លន់ស្លោរ ព្រោះថាការស្លន់ស្លោរនឹងធ្វើឲ្យយើងបាត់បង់នូវផលប្រយោជន៍ទៅវិញទេ”។

 សម្ដេចបានលើកឧទាហរណ៍ថា បើបងប្អូនដាក់ប្រាក់នៅធនាគារយកការប្រាក់រយៈពេល៦ខែឬ១ឆ្នាំ បើបងប្អូនស្លន់ស្លោរទៅដកប្រាក់មុនពេលកំណត់ នោះបងប្អូននឹងបាត់បង់អត្រាការប្រាក់សន្សំព្រោះតែបងប្អូនដកលុយពីធនាគារមុនពេលកំណត់។ ជាទូទៅពេលបងប្អូនដាក់ប្រាក់សន្សំមានកាលកំណត់ដើម្បីបានការប្រាក់ខ្ពស់ តែបងប្អូនដកប្រាក់មុនពេលកំណត់ នោះធនាគារមិនផ្ដល់ការប្រាក់ខ្ពស់ឡើយ។

សម្ដេចបានបញ្ជាក់ហើយបញ្ជាក់ទៀតថាសូមកុំស្លន់ស្លោរចំពោះហានិភ័យដែលអាចកើតមាន។ កាលពីឆ្នាំ២០០៨ កាលកើតមានវិបត្តិហិរញ្ញវត្ថុសកលក៏មិនមានផលប៉ះពាល់ដល់ប្រព័ន្ធធនាគារនៅកម្ពុជាដែរ។ ចំណែកប្រទេសថៃក៏បានបញ្ជាក់ផងដែរចំពោះការដួលរលំធនាគារអាមេរិកគ្មានផលប៉ះពាល់ដល់ខ្លួនឡើយ។

ការភ័យស្លន់ស្លោរណាមួយនៅកម្ពុជានឹងនាំទៅរកហានិភ័យនៃភាពច្របូកច្របល់ក្នុងវិស័យហិរញ្ញវត្ថុនិងធនាគារនៅកម្ពុជា។ មកដល់ពេលនេះទោះការដួលរលំធនាគារនៅអាមេរិកពិតមែន តែផលប៉ះពាល់ដល់សហរដ្ឋអាមេរិកអាចមានតិចតួចបំផុតព្រោះអាមេរិកមានបទពិសោធន៍ក្នុងការគ្រប់គ្រងសេដ្ឋកិច្ចក្នុងអំឡុងពេលមានវិបត្តិ។ ជាក់ស្ដែងកាលវិបត្តិហរញ្ញវត្ថុសកលឆ្នាំ២០០៨ បានផ្ដល់ជាមេរៀនសម្រាប់អាមេរិក ដូច្នេះអាមេរិកមានការប្រុងប្រយ័ត្នមិនឲ្យបញ្ហានេះកើតមិនមាននោះទេ។

គួរបញ្ជាក់ផងដែរថាទាក់ទងនឹងបញ្ហាដួលរលំធនាគារនៅអាមេរិកនេះ លោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដាក៏បានបញ្ជាក់ផងដែរថា ទីផ្សាររបស់យើងនិងអាមេរិកគឺដាច់ឆ្ងាយពីគ្នា ដូច្នេះវាមិនបង្កផលប៉ះពាល់ដល់ប្រព័ន្ធធនាគារនៅកម្ពុជានិងវិស័យធនាគារឡើយ។

លោកបណ្ឌិតបានឲ្យដឹងទៀតថា ធនាគារនៅកម្ពុជាគឺស្ថិតក្រោមច្បាប់និងការអនុវត្តន៍ក៏ដូចជាត្រួតពិនិត្យនិងអនុវត្តន៍យ៉ាងយកចិត្តទុកដាក់ពីធនាគារជាតិនៃកម្ពុជា។ ត្រង់នេះលោកបណ្ឌិតបានបញ្ជាក់បន្ថែមថាថ្វីត្បិតតែប្រទេសយើងតូចមែន តែធនាគារជាតិនៃកម្ពុជារបស់យើងមានជំនាញពេញលេញក្នុងការបញ្ចៀសហានិភ័យបាន។

 ចង់តាមដានព័ត៌មានទាក់ទងនឹងហិរញ្ញវត្ថុក៏ដូចជាការប្រើលុយឲ្យចំណេញ និងវិនិយោគលុយដើម្បីបង្កើនទ្រព្យ អាចតាមដាន Facebook page Toeuy Hong-ទឿយ ហុង និងចូលគ្រុបតេឡេក្រាម   https://t.me/toeuy_hong៕