សម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជាថ្មីៗនេះ បានអំពាវនាវប្រជាពលរដ្ឋ កុំឲ្យជឿលើការឃោសនាពីសំណាក់មេខ្យល់លើការចុះឈ្មោះដើម្បីទទួលបានដីសម្បទានពីរដ្ឋជាថ្នូរនឹងការបង់ប្រាក់កាក់ផ្សេងៗ ព្រោះរាជរដ្ឋាភិបាលពុំមានគោលការណ៍បែបនេះឡើយ។ ហើយសម្ដេចក៏បានព្រមានចាត់វិធានការលើមេខ្យល់ទាំងអស់នោះផងដែរ។
ការអំនាវរបស់សម្ដេចធិបតីនាយករដ្ឋមន្ដ្រីធ្វើឡើង បន្ទាប់ពីសម្ដេចបានទទួលព័ត៌មានថានៅក្នុងស្រុកពេជ្រាដា នៃខេត្ដមណ្ឌលគិរី មានមេខ្យល់បានដើរបំផុសបំផុលលើការចុះឈ្មោះដើម្បីទទួលបានដីសម្បទានរដ្ឋនេះ។ ដើម្បីឆ្លើយតបបញ្ហាខាងលើ សម្ដេចក៏បានណែនាំឲ្យរដ្ឋបាលខេត្ដធ្វើការស្រាវជ្រាវ និងចាត់វិធានការជាបន្ទាន់លើករណីនេះផងដែរ។
ថ្លែងនៅក្នុងពិធីសម្ពោធអោយប្រើប្រាស់ជាផ្លូវការ ទំនប់អូរតេធិបតី ទំនប់សែនសុខដុម និងទំនប់សែនមនោរម្យ នៅខេត្តមណ្ឌលគិរី កាលពីថ្ងៃទី២៤ ខែតុលា ឆ្នាំ២០២៤ សម្តេចមហាបវរធិបតី បានមានប្រសាសន៍ថា” ខ្ញុំសូមបញ្ជាក់មិនមានមេខ្យល់ណាទៅអោយបំផុសដើម្បីអោយមកយកដីសម្បទាននោះទេ។ បើចុះឈ្មោះត្រូវតាមយន្តការដ្ឋ ដោយកន្លងទៅយើងមានយន្តការដីសម្បទានចុះតាមអាជ្ញាធរឃុំ ហើយក្រៅពីហ្នឹង បន្តិចទៀតពេលមានគណៈកម្មការបង្កើតគឺយើងមានការផ្សព្វផ្សាយច្បាស់លាស់។ អុីចឹងសូមអោយបងប្អូនកុំជឿលើមេខ្យល់ដែលកំពុងបំផុសដើរយកលុយថាចុះឈ្មោះដើម្បីយកដីនេះ។ អត់បានទេហើយសូមអោយអាជ្ញាធរសមត្ថកិច្ចមើលមេខ្យល់ហ្នឹងដើម្បីអនុវត្តច្បាប់ ព្រោះថាមិនអុីចឹងដើរបោកប្រជាពលរដ្ឋ បោកប្រជាជនអស់លុយហើយមានរឿងទៀត”។
គួរបញ្ជាក់ផងដែរថា នាពេលកន្លងមករាជរដ្ឋាភិបាលបានផ្តល់ដីសម្បទានដល់ប្រជាពលរដ្ឋខ្មែរដែលខ្វះដីពិតប្រាកដ និងបានជួយអភិវឌ្ឍន៍តំបន់ដីទាំងនោះដល់ពួកគាត់ងាយស្រួលរស់នៅ និងផ្តល់ជាដីសម្រាប់ធ្វើកសិកម្មជាដើម ដើម្បីធ្វើយ៉ាងណាចូលរួមក្នុងការកាត់បន្ថយការកាប់ទន្ទ្រានព្រៃ៕
