សាកលវិទ្យាល័យភូមិន្ទភ្នំពេញ (RUPP) ដែលជាគ្រឹះស្ថានឧត្តមសិក្សាធំជាងគេ និងចាស់ជាងគេនៅកម្ពុជា ជិតទទួលបានអគារសិក្សាថ្មីមួយបន្ថែមទៀតហើយ ដើម្បីឆ្លើយតបទៅនឹងកំណើននិស្សិត និងតម្រូវការសិក្សាស្រាវជ្រាវឲ្យកាន់តែមានប្រសិទ្ធភាព។

តាមការបញ្ជាក់ពីលោកបណ្ឌិត ជេត ជាលី សាកលវិទ្យាធិការនៃសាកលវិទ្យាល័យភូមិន្ទភ្នំពេញ គម្រោងសាងសង់អគារសិក្សាថ្មីនេះ ទទួលបានការគាំទ្រពីរាជរដ្ឋាភិបាលកម្ពុជា ពិសេសពីសំណាក់ក្រសួងសេដ្ឋកិច្ច និងហិរញ្ញវត្ថុ និងក្រសួងអប់រំ យុវជន និងកីឡា។

សរសេរនៅលើបណ្ដាញសង្គមនៅថ្ងៃទី១១ ខែកញ្ញា ឆ្នាំ២០២៦ លោកបណ្ឌិតបានបញ្ជាក់ដូច្នេះថា៖ RUPP នឹងទទួលបានអគារថ្មីមួយទៀត។ យើងទាំងអស់គ្នាសូមគោរពថ្លែងអំណរគុណចំពោះរាជរដ្ឋាភិបាលកម្ពុជា ជាពិសេសក្រសួងសេដ្ឋកិច្ច និង ហិរញ្ញវត្ថុ និង ក្រសួងអប់រំ យុវជន និង កីឡា ដែលបានឆ្លើយតបជាវិជ្ជមានទៅនឹងសេចក្តីត្រូវការរបស់សាកលវិទ្យាល័យយើង។

លោកសាកលវិទ្យាធិកាបន្ដថា៖ ចាប់ពីថ្ងៃស្អែកទៅ (ថ្ងៃទី១២ ខែកញ្ញា) ខាងសាងសង់នឹងចាប់ផ្តើមបិទរបងការដ្ឋាននិងចាប់ផ្តើមការសាងសង់របស់ខ្លួន។ ការសាងសង់នេះអាចមានការរំខានខ្លះដល់ការចតរថយន្តនិងសម្លេងរំខានដល់ការសិក្សានៅថ្នាក់ក្បែរការដ្ឋាន៕