កន្លងមកយើងនិយមឮអំពីរឿងរ៉ាវរបស់មហាសេដ្ឋីល្បីៗលើពិភពលោក ដែលវិនិយោគទៅលើបច្ចេកវិទ្យា ដើម្បីដើរតាមសកលភាវូបនីយកម្ម ប៉ុន្តែអាជីវកម្មបែបប្រពៃណីរបស់មហាសេដ្ឋី៣សាសន៍ Robert Kuok គឺវិនិយោគនៅលើវិស័យកសិកម្ម ចាប់តាំងពីលោកនៅជាយុវជនស្ទើរកម្លោះមកម៉្លេះ។
ជាមួយគ្នានេះដែរ សាច់រឿងរបស់លោកបានអង្រួនចិត្តបណ្តាសហគ្រិនជាច្រើន ដែលជាអ្នកជំនាន់ក្រោយបានដើរតាមគន្លងរបស់លោកមិនតិចនោះទេ តាមរយៈការទទួលរងនូវឥទ្ធិពលពី ដំណើរតស៊ូក្នុងជីវិត និងអាជីវកម្មរបស់លោក ពីចំណុចតូចតាច រហូតគេទទួលស្គាល់ថាជាស្តេចស្ករនៅអាស៊ី (The King of Sugar in Asia) ។ មុននឹងស្វែងយល់ពីក្បួនអាជីវកម្មជិតមួយសតវត្សរបស់ស្ថាបនិក Kuok Group យើងក៏ទៅជ្រាបត្រួសៗ អំពីដំណើរដើមទងនៃជីវិតរបស់ស្តេចស្ករ ស រូបនេះជាមុនសិន ។
លោក Robert Kuok កើតនៅ ថ្ងៃទី០៦ ខែតុលា ឆ្នាំ១៩២៣ នាទីក្រុងJohor Bahruប្រទេសម៉ាឡេស៊ី ក្នុងគ្រួសារដែលមានដើមកំណើតជាជនជាតិចិនដែលភៀសខ្លួនមកកាន់ម៉ាឡេស៊ីដោយសារបញ្ហាសង្រ្គាមនាក្នុងកំឡុងសតវត្សទី២០ និងមានបងប្អូន៣នាក់ ដោយលោកជាកូនពៅក្នុងគ្រួសារ។ មិនយូរប៉ុន្មាន លោកក៏បានធ្វើការផ្លាស់ប្តូរទីលំនៅមកកាន់ប្រទេសសិង្ហបុរីតែម្នាក់ឯងក្នុងវ័យ១៩ឆ្នាំ ដោយបានសិក្សានៅសកលវិទ្យាល័យ Raffles Institution ដែលមានលោក លី ក្វាន់យូ អតីតនាយករដ្ឋមន្រ្តី១របស់សិង្ហបុរីជាមិត្តរួមថ្នាក់។ ក្នុងវ័យរៀនសូត្រនេះដែរ លោកក៏បានចូលទៅបម្រើការងារ ឱ្យសហគ្រាសជួញដូរអង្ករ Mitsubishi របស់ជប៉ុន ដោយមានតួនាទីជាជំនួយការ ព្រមទាំងបានខិតខំធ្វើការងារឥតមានស្រាកស្រាន្ត ដើម្បីភាពរីកចម្រើនរបស់ស្ថាប័ន។
ប៉ុន្តែមេរៀនដ៏អស្ចារ្យ ដែលបានបង្រៀនលោកឱ្យក្លាយជាមនុស្សអស្ចារ្យ គឺលោកទទួលបានចំណេះដឹង បទពិសោធន៍ពីទីនេះ និងសិស្សច្បងរបស់លោកម្នាក់។ មេរៀនដែលរៀនដោយឥតបង់ថ្លៃ គឺការរកឃើញខ្លួនឯងថា លោកពិតជាស្រឡាញ់វិស័យដែលលោកកំពុងធ្វើនេះខ្លាំងបំផុត។ លោកបេ្តជ្ញាថា ពេលលោកត្រឡប់ទៅប្រទេសកំណើតវិញ លោកនឹងក្លាយជាបុគ្គលមួយរូប ដែលរួមចំណែកធ្វើឱ្យកសិកររីករាយ។
ដោយហេតុថាម៉ាឡេស៊ី ជាប្រទេសដែលសម្បូរទៅដោយធនធានកសិកម្ម អង្ករ ស្រូវសាឡី ក្លាយទៅជាគោលដៅទី១ របស់លោក។ ក្នុងវ័យ២៤ ឆ្នាំយុវជន Robert បានធ្វើការត្រឡប់មកមាតុភូមិរបស់លោកវិញ និងបានកសាងអាណាចក្រជំនួញថ្មីថ្មោង ដោយមានបងប្អូនបង្កើតទាំង៣ជាជំនួយការក្នុងអាជីវកម្ម ដោយចាប់ផ្តើមដំបូងគឺជាអាជីវកម្មបែបប្រពៃណីប៉ុណ្ណោះ និងបានរីកធំធាត់រហូតមកដល់បច្ចុប្បន្ន ក្លាយជាអាជីវកម្មលេចធ្លោមួយផងដែរនៅអាស៊ី។
ចំពោះដំបូន្មានក្នុងអាជីវកម្មរបស់លោក៣យ៉ាងដែលលោកយកមកបណ្តាក់ទុនវិញនោះគឺ៖
១.ស្តាប់អ្នកដទៃ រៀនសូត្រនូវរឿងរ៉ាវល្អៗពីអ្នកដទៃឱ្យបានច្រើនបំផុត
២.កុំភ័យខ្លាចចំពោះហានិភ័យ ចូរក្លាហានក្នុងការបង្កើតកំហុស
៣.ដាក់ខ្លួនឱ្យទាបអ្នកដទៃនឹងបង្រៀនអ្នក។
ជុំវិញដំបូន្មានទាំងអម្បាលម៉ានខាងលើនេះគឺលោកបានទទួលពីការទូន្មានពីអ្នកម្តាយរបស់លោក ក្នុងពេលមុនចាប់ផ្តើមរកស៊ី។ គួរបញ្ជាក់ផងដែរថា លោកមហាសេដ្ឋី Robert Kuok គឺជាស្ថាបនិកក្រុមហ៊ុន Kuok Group ដែលមានបុត្រសម្ព័ន្ធរកស៊ីលើវិស័យជាច្រើនដូចជា អចលនទ្រព្យ ឧស្សាហកម្ម កសិឧស្សាហកម្ម សហគ្រាស និងសណ្ឋារគារផងដែរ។ លោកបានក្លាយជាមហាសេដ្ឋីទីមួយនៅម៉ាឡេស៊ី និងឈរនៅលេខរៀងទី១០៤ នៅក្នុងពិភពលោក ជាសេដ្ឋីដែលមានទ្រព្យសម្បត្តិ ១៥.៥ ពាន់លានដុល្លារក្នុងជន្មាយុ ៩៨ ឆ្នាំ ព្រមទាំងត្រូវបានគេស្គាល់នៅទូទាំងពិភពលោកថាជាសេ្តចស្ករ ស នៅអាស៊ី នេះបើយោងតាមការចុះផ្សាយរបស់គេហទំព័រ Forbes ហើយបច្ចុប្បន្ននេះលោកកំពុងរស់នៅទីក្រុងហុងកុង៕
អត្ថបទដោយ ពីង ជូអេង ( ត្រចៀកកាំ )
