ការប្រឡងសញ្ញាបត្រមធ្យមសិក្សាទុតិយភូមិ (ឬប្រឡងបាក់ឌុប) សម្រាប់ឆ្នាំ២០២៦ បានប្រព្រឹត្ដឡើងរយៈពេល ២ ថ្ងៃ គឺថ្ងៃទី១០-១១ សីហា បានបញ្ចប់ទៅហើយ នៅឡើយរង់ចាំពិនិត្យមើលលទ្ធផលនៃការប្រឡងតែប៉ុណ្ណាះ។

យ៉ាងណាយោងតាមសេចក្ដីប្រកាសព័ត៌មានរបស់ក្រសួងអប់រំ យុវជន និងកីឡា កាលពីថ្ងៃទី៣១ ខែសីហា ឆ្នាំ២០២៦ បានឲ្យដឹងថា លទ្ធផលនៃការប្រឡងទុតិយភូមិឆ្នាំ២០២៦ នេះនឹងត្រូវប្រកាសនៅថ្ងៃទី០២ ខែកញ្ញា ឆ្នាំ២០២៦ ព្រមទាំងធ្វើការផ្សព្វផ្សាយតាមបណ្ដាញទំនាក់ទំនងសង្គមផ្លូវការរបស់ក្រសួងអប់រំ យុវជន និងកីឡា facebook.com/moey.gov.kh ផងដែរ សូមជូនពរបេក្ខជនប្រឡងទាំងអស់ទទួលបានលទ្ធផលល្អដូចបំណង។

គួរជម្រាបថា ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង​១០ សីហា ២០២៦ នេះមានបេក្ខជនចុះឈ្មោះប្រឡងសរុប ១៥១ ២៣៨ នាក់​ (ស្រី ៨៤ ៧៣៥ នាក់) ក្នុងនោះ បេក្ខជនថ្នាក់វិទ្យាសាស្រ្តមានចំនួន​ ៣៧ ៤៤៥ នាក់​ (ស្រី ២២ ១៩៣) បេក្ខជនថ្នាក់វិទ្យាសាស្រ្តសង្គម មានចំនួន ១១៣ ៧៩៣ នាក់ (ស្រី ៦២ ៥៤២ នាក់) បេក្ខជនត្រូវបានរៀបចំនួន​ ២៥នាក់ក្នុងមួយបន្ទប់ តាមមណ្ឌលសំនេរនីមួយលើកលែងតែបន្ទប់ចុងក្រោយនិងបន្ទប់ដែលមានបេក្ខជនមកពីវិទ្យាល័យអប់រំពិសេស៕