ក្រុមហ៊ុន DEN NOKOR (CAMBODIA) INVESTMENT CO.,LTD និងក្រុមហ៊ុន G.T.V.C IMPORT EXPORT CO.,LTD នឹងធ្វើការអភិវឌ្ឍបង្កើតរមណីយដ្ឋានថ្មីចំនួន ២ ដែលមានទីតាំងនៅខេត្ដព្រះសីហនុ និងខេត្ដកោះកុង ខណៈក្រុមហ៊ុនទាំងនេះទើបនឹងទទួលបានការអនុម័តពីក្រុមប្រឹក្សាអភិវឌ្ឍន៍កម្ពុជា (CDC) លើគម្រោងរបស់ខ្លួន។ ចំពោះគម្រោងវិនិយោគទាំង ២ ខាងលើនេះ នឹងត្រូវចំណាយដើមទុនសរុបជិត ៤០ លានដុល្លារផងដែរ។

យោងតាមការចុះផ្សាយពី CDC កាលពីថ្ងៃទី១៣ ខែមេសា ឆ្នាំ២០២៣ បានឲ្យដឹងថា ក្រុមហ៊ុន DEN NOKOR (CAMBODIA) INVESTMENT CO.,LTD នឹងធ្វើការវិនិយោគអភិវឌ្ឍន៍រមណីយដ្ឋានទេសចរណ៍លើកោះទទឹង ដែលមានទីតាំងស្ថិតនៅភូមិកោះស្ដេច ឃុំកោះស្ដេច ស្រុកគិរីសាគរ ខេត្ដកោះកុង។ សម្រាប់ទំហំនៃការវិនិយោគគម្រោងនេះគឺមានប្រមាណ ៣០ លានដុល្លារ និងអាចបង្កើតឱកាសការងារចំនួន ១៤២ កន្លែង។

ដោយឡែកចំពោះក្រុមហ៊ុន G.T.V.C IMPORT EXPORT CO.,LTD នឹងធ្វើការអភិវឌ្ឍនៅលើកោះមួយ ដែលមានទីតាំងស្ថិតនៅសង្កាត់កោះរ៉ុងសន្លឹម ក្រុងកោះរ៉ុង មានចំណាយប្រមាណ ៥០ គីឡូម៉ែត្រពីក្រុងព្រះសីហនុ និងចម្ងាយប្រមាណ ៤៧ គីឡូម៉ែត្រពីកោះពួឡូវៃ។ គម្រោងអភិវឌ្ឍន៍នេះគឺមានទុនវិនិយោគប្រមាណ ៧.៧ លានដុល្លារ និងបង្កើតឱកាសការងារចំនួន ៤៩ កន្លែង៕

អត្ថបទ៖ កឹម ប៊ុនធឿន