នៅថ្ងៃទី២៧ ខែវិច្ឆិកា ឆ្នាំ២០២៤ នេះ និយ័តករអាជីវកម្មអចលនវត្ថុនិងបញ្ចាំបង្ហាញគម្រោងដីឡូត៍ចំនួន ៣ គម្រោងនៅក្នុងខេត្ដ សៀមរាប បាត់ដំបង និងខេត្ដកំពង់ស្ពឺ កំពុងប្រកបអាជីវកម្មដោយគ្មានអាជ្ញាបណ្ណពីនិយ័តករអាជីវកម្មអចលនវត្ថុនិងបញ្ចាំឡើយ។ យោងតាមសេចក្ដីជូនដំណឹងគម្រោងដីឡូត៍ដែលគ្មានអាជ្ញាបណ្ណនេះរួមមាន៖

១. គម្រោងដីឡូត៍ ភូមិលំហែ ជ្រោះជ្រៃព្រៃក្មេង ដែលមានទីតាំងស្ថិតនៅភូមិព្រៃឈើទាល ឃុំព្រៃក្មេង ស្រុកភ្នំពេញស្រួច ខេត្ដកំពង់ស្ពឺ។

២. គម្រោងដីឡូត៍ ភូមិឋាន ធម្មជាតិ ដែលមានទីតាំងស្ថិតនៅភូមិត្រាង ឃុំអូរតាគី ស្រុកថ្មគោល ខេត្ដបាត់ដំបង។

៣. គម្រោងដីឡូត៍ ក្រុមហ៊ុន តឹកប៉ុន វិនធី ឯ.ក ដែលមានទីតាំងស្ថិតនៅភូមិច្រេស ឃុំសណ្ដែក ស្រុកប្រាសាទបាគង ខេត្ដសៀមរាប។

ជាមួយគ្នានេះ និយ័តករអាជីវកម្មអចលនវត្ថុនិងបញ្ចាំ បានអំពាវនាវឲ្យសាធារណជនទាំងអស់កុំចូលរួមធ្វើអាជីវកម្ម ឬពាក់ព័ន្ធនឹងគម្រោងអភិវឌ្ឍដីឡូត៍ដែលគ្មានអាជ្ញាបណ្ណខាងលើ ដែលអាចធ្វើឲ្យប៉ះពាល់ ឬខាតបង់ប្រយោជន៍ណាមួយជាយថាហេតុ៕