ក្រុមការងារក្រសួងសាធារណការនិងដឹកជញ្ជូន និងក្រសួងរ៉ែនិងថាមពល បានចុះពិនិត្យទីតាំងគម្រោងសាងសង់ផ្លូវរថភ្លើង ពីបំបែកផ្លូវរថភ្លើង ម្តុំភូមិកំរ៉ែង ឃុំស្វាយស ភ្ជាប់មកតំបន់សេដ្ឋកិច្ចពិសេសស្រុកក្រគរ ក្បែររោងចក្រ រថយន្ត Ford ដែលមានប្រវែង ២០ គីឡូម៉ែត្រ សម្រាប់បម្រើឲ្យការដឹកជញ្ជូនទំនិញគ្រប់ប្រភេទ និងជាជម្រើសមួយទៀត កាន់តែមានលក្ខណៈងាយស្រួល។ នេះបើយោងតាមការចេញផ្សាយដោយមន្ទីរសាធារណការ និងដឹកជញ្ជូនខេត្ដពោធិ៍សាត់ កាលពីថ្ងៃទី២២ ខែមករា ឆ្នាំ២០២៦។

គួររំលឹកថា កាលពីពាក់កណ្តាលឆ្នាំ ២០២៥ កន្លងទៅ សម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជា បានណែនាំឲ្យក្រសួងដែលពាក់ព័ន្ធសិក្សា និងរៀបចំគម្រោងតភ្ជាប់ផ្លូវរថភ្លើងចូលទៅកាន់ តំបន់សេដ្ឋកិច្ចពិសេស ក្នុងស្រុកក្រគរ ខេត្តពោធិ៍សាត់ នេះផងដែរ។

គោលបំណង នៃការសាងសង់ផ្លូវរថភ្លើងថ្មីនេះ គឺដើម្បីសម្រួលដល់ការដឹកជញ្ជូនទំនិញ និងវត្ថុធាតុដើមសម្រាប់រោងចក្រក្នុងតំបន់នោះ ជាពិសេសរោងចក្រដំឡើងរថយន្ត និងគ្រឿងអេឡិចត្រូនិក។ ពិសេសជួយកាត់បន្ថយចំណាយភស្តុភារកម្ម (Logistics) និងបង្កើនសមត្ថភាពប្រកួតប្រជែងរបស់ខេត្តផងដែរ៕

កាលពីពេលកន្លងទៅ ប្រមុខរាជរដ្ឋាភិបាលកម្ពុជា បានណែនាំឲ្យក្រសួងពាក់ព័ន្ធ ពិសេសក្រសួងសាធារណការ និងដឹកជញ្ជូន ធ្វើការសិក្សាលទ្ធភាពនៅក្នុងការសាងសង់ផ្លូវរថភ្លើងខាងលើផងដែរ៕