ជាដំណឹងដ៍រីករាយមួយសម្រាប់អ្នកខេត្ដពោធិ៍សាត់ ខណៈក្រុមហ៊ុន Pursat Special Economic Zone Co., Ltd. កំពុងធ្វើការស្នើសុំនៅក្នុងការបង្កើតតំបន់សេដ្ឋកិច្ចពិសេសថ្មីនៅលើផ្ទៃដីប្រមាណ ១៤០ ហិកតានៅក្នុងខេត្ដដែលកំពុងមានសក្ដានុពលមួយនេះ។
តាមការដកស្រង់ពីក្រុមប្រឹក្សាអភិវឌ្ឍន៍កម្ពុជា នៅថ្ងៃទី៨ ខែកក្កដា ឆ្នាំ២០២៤ បានឲ្យដឹងថា គម្រោងស្នើសុំបង្កើតតំបន់សេដ្ឋកិច្ចពិសេសនេះ មានទីតាំងស្ថិតនៅក្បាលដីលេខ៤៦៦ ត្រង់គីឡូម៉ែត្រលេខ១៥៤ លើផ្លូវជាតិលេខ៥ ភូមិសារវ័ន ឃុំស្នាអន្សា ស្រុកក្រគរ ខេត្តពោធិ៍សាត់។ ការស្នើសុំគម្រោងវិនិយោគថ្មីនាពេលនេះ បានបង្ហាញអំពីភាពជោគជ័យក្នុងការរីកចម្រើនរបស់សង្គមសេដ្ឋកិច្ចកម្ពុជា ជាពិសេស ការផ្តល់នូវជំនឿទុកចិត្តពីសំណាក់វិនិយោគិន មកលើការដឹកនាំរបស់រាជរដ្ឋាភិបាលកម្ពុជា។
សូមជម្រាបផងដែរថា ខេត្ដពោធិ៍សាត់បច្ចុប្បន្នកំពុងក្លាយជាទីតាំងដ៏សំខាន់មួយសម្រាប់ការវិនិយោគ ខណៈថ្មីៗកន្លងទៅនេះ ក្រុមហ៊ុន Minebea របស់ជប៉ុនបានសម្រេចដាក់ទុនវិនិយោគសាងសង់រោងចក្រទី២ របស់ខ្លួនលើផ្ទៃដីប្រមាណ៥០ហិកតា ក្នុងតំបន់សេដ្ឋកិច្ចពិសេសក្រគរផងដែរ។ ហើយបច្ចុប្បន្នរោងចក្រដំឡើងរថយន្ដ Ford ក៏កំពុងដំណើរការសង្វាក់ផលិតកម្មរបស់ខ្លួននៅក្នុងខេត្ដពោធិ៍សាត់នេះដូចគ្នា៕
