តាមរយៈអ្នកនាំពាក្យរាជរដ្ឋាភិបាលកម្ពុជានៅថ្ងៃទី២២ ខែមេសា ឆ្នាំ២០២៥ នេះបញ្ជាក់ថា កំពង់ផែទេសចរណ៍អន្តរជាតិកំពត នឹងត្រូវប្រើប្រាស់រូបមន្ត “PPP” (Public-Private Partnership) ជាលើកដំបូងក្នុងវិស័យរដ្ឋ។

រូបមន្តនេះបានកំណត់ឱ្យរដ្ឋជាអ្នក​វិនិយោគ​លើការបង្កើត​ទីតាំង ខណៈ​​​វិស័យ​ឯកជនជាអ្នកវិនិយោគ​​លើប្រតិបត្តិការនិងថែទាំ (Operation and Maintenance) ដើម្បី​ធានាប្រសិទ្ធភាព​នៃការផ្ដល់​សេវា និង​ទាក់ទាញ​ភ្ញៀវទេសចរ ដែល​នឹងផ្ដល់ផល​ប្រយោជន៍​ដល់ប្រជាជន​នៅមូលដ្ឋាន ក៏​ដូចជា​ខេត្ត​ជាប់​មាត់សមុទ្រ។

សូមជម្រាបថាកំពង់ផែអន្តរជាតិកំពតនេះមានតម្លៃ១៨លានដុល្លារ គ្របដណ្តប់លើផ្ទៃដីប្រមាណ៤ហិចតា និងបានសម្ភោធដាក់ឱ្យប្រើប្រាស់កាលពីថ្ងៃទី២១ ខែមេសា​ ឆ្នាំ២០២៥។ កំពង់ផែនេះស្ថិត តាមដៃនៃដងព្រែក ក្នុងស្រុកទឹកឈូ ដែលមានចម្ងាយ ៩,៣គីឡូម៉ែត្រ ពីទីរួមខេត្តកំពត​ ដែលអាចតភ្ជាប់ទស្សនាចរ តំបន់សមុទ្រកម្ពុជា ទៅ-មកប្រទេសនានាលើពិភពលោក៕