ភ្នំពេញ, ថ្ងៃទី ២៩ ខែសីហា ឆ្នាំ ២០២៦ – ក្រុមហ៊ុន អ័រគីន កម្ពុជា បានរៀបចំកម្មវិធីសប្បុរសធម៌ប្រចាំឆ្នាំក្រោមប្រធានបទ «អ័រគីន និងស្នាមញញឹមកុមារជនបទ» ជាលើកទី៣ ដោយឈរលើគោលដៅពង្រឹងគុណភាពនៃការសិក្សា សុខុមាលភាព និងបរិស្ថានរស់នៅរបស់កុមារនៅតំបន់ជនបទ។

កម្មវិធីនេះត្រូវបានរៀបចំឡើងនៅ សាលាបឋមសិក្សា ដូនម៉ៅរីករាយ ដោយផ្តោតជាអាទិភាពលើការគាំទ្រទាំងផ្នែកសម្ភារៈសិក្សា សុខភាព និងបរិយាកាសសិក្សាប្រកបដោយសុវត្ថិភាព។ ក្នុងឱកាសនោះ អ័រគីន កម្ពុជា បាននាំយកសម្ភារៈសិក្សាចាំបាច់ សៀវភៅ និងឧបករណ៍អប់រំជូនដល់សិស្សានុសិស្ស ដើម្បីជួយសម្រួលដល់ការសិក្សាប្រចាំថ្ងៃ និងជំរុញទឹកចិត្តឱ្យពួកគេបន្តខិតខំរៀនសូត្រថែមទៀត។

លើសពីនេះ ក្រុមហ៊ុនក៏បានផ្តល់ជូននូវ ទោងយោលកម្សាន្ត សម្រាប់កុមារ និងធុងចម្រោះទឹកស្អាត ដើម្បីបង្កើតទាំងកន្លែងលេងកម្សាន្ត ប្រកបដោយភាពសប្បាយរីករាយ និងធានាឱ្យសិស្សានុសិស្ស មានលទ្ធភាពប្រើប្រាស់ទឹកស្អាតសម្រាប់បរិភោគ និងប្រើប្រាស់ប្រចាំថ្ងៃនៅក្នុងសាលារៀន។

លោក យៀប សុគន្ធថៃ អគ្គនាយកក្រុមហ៊ុន អ័រគីន កម្ពុជា បានថ្លែងថា៖
«កុមារគ្រប់រូបសមនឹងទទួលបានឱកាសស្មើគ្នា មិនថាពួកគេរស់នៅទីក្រុង ឬជនបទនោះទេ។ នៅថ្ងៃនេះ យើងមិនបានមកត្រឹមតែនាំយកសម្ភារៈ ឬឧបករណ៍នានានោះទេ — យើងបានមកដើម្បីប្រាប់ពួកគេថា ពួកគេមានតម្លៃ ពួកគេត្រូវបានគេគិតដល់ ហើយអនាគតរបស់ពួកគេគឺជាអនាគតរបស់យើងទាំងអស់គ្នា។ ស្នាមញញឹមរបស់កុមារម្នាក់ៗ គឺជាកម្លាំងចិត្តដ៏ខ្លាំងក្លាបំផុតសម្រាប់ពួកយើងក្នុងការបន្តធ្វើអ្វីដែលល្អប្រសើរជាងមុន មិនត្រឹមតែក្នុងអាជីវកម្មរបស់យើងប៉ុណ្ណោះទេ ប៉ុន្តែនៅក្នុងសហគមន៍ដែលយើងបម្រើផងដែរ។»

អ្វីដែលពិសេសជាងនេះទៅទៀត អ័រគីន កម្ពុជា ក្នុងនាមជាក្រុមហ៊ុនឈានមុខគេផ្នែកគ្រប់គ្រងសត្វល្អិត បានយកជំនាញពិសេសរបស់ខ្លួនមកចូលរួមចំណែកថែរក្សាសុខភាពកុមារ តាមរយៈការដាំរុក្ខជាតិកម្ចាត់មូស និងការបាញ់ផ្សែងកម្ចាត់មូសនៅទូទាំងបរិវេណសាលា ដើម្បីកាត់បន្ថយហានិភ័យនៃជំងឺដែលឆ្លងតាមរយៈមូស និងបង្កើតបរិយាកាសសិក្សាប្រកបដោយសុវត្ថិភាពជាងមុន។

អ័រគីន កម្ពុជា បន្តជឿជាក់យ៉ាងមុតមាំថា ការវិនិយោគលើកុមារ គឺជាការវិនិយោគលើអនាគតដ៏ភ្លឺស្វាងរបស់ប្រទេសជាតិ។ រាល់ការចែករំលែក ការយកចិត្តទុកដាក់ និងស្នាមញញឹមដែលបានផ្តល់នៅថ្ងៃនេះ គឺជាប្រភពនៃកម្លាំងចិត្តដ៏សំខាន់ ដើម្បីជួយឱ្យកុមារបន្តក្ដីសុបិន និងឈានទៅរកអនាគតដែលពោរពេញដោយឱកាស។