កាលពីថ្មីៗកន្លងទៅនេះ​ ឯកឧត្តមរដ្ឋមន្រ្តី វេង សាខុន និងសហការីបានធ្វើដំណើរទៅពិនិត្យកសិដ្ឋាន មួយកន្លែងគឺ Maagan Muchael kibbutz (កសិដ្ឋានចិញ្ចឹមត្រី) នៅក្នុងនោះលោកនាយកគ្រប់គ្រងបច្ចេកទេសកសិដ្ឋានចិញ្ចឹមត្រី បាននិយាយថា (ត្រីលម្អ និងត្រីសាច់) អាចផលិតបាន ៣០លានកូន/ឆ្នាំ (១៣ ប្រភេទត្រី)  ក្នុងនោះនាំចេញ ៣០% (កូនត្រីរស់) ទៅកាន់ប្រទេស កាណាដា សហរដ្ឋអាមេរិក និងអ៊ឺរ៉ុប។

នាយកគ្រប់គ្រងនៅកសិដ្ឋាន Maagan Muchael kibbutz បានបន្តទៀតថា ក្នុង ១ឆ្នាំកសិដ្ឋានអាចផលិតសាច់ត្រីបាន ២ពាន់តោន សម្រាប់ផ្គត់ផ្គង់ឲ្យទីផ្សារក្នុងស្រុក។ ទូទាំងកសិដ្ឋានបានអនុវត្តប្រព័ន្ធកសិដ្ឋានវៃឆ្លាត (Smart Agriculture) គ្រប់ខ្សែច្រវាក់ផលិតកម្មត្រូវបានបញ្ជាតាមទូរស័ព្ទ ប្រើប្រព័ន្ធសូឡា និងបច្ចេកវិទ្យាខ្ពស់ក្នុងការចិញ្ចឹម បង្កាត់ពូជ ផ្តល់ចំណី និងកែច្នៃ។ ក្នុងមួយឆ្នាំកសិដ្ឋានអាចរកចំណូលបាន ២៥លានដុល្លារ។ 

ជាចុងក្រោយឯកឧត្តមរដ្ឋមន្រ្តី វេង សាខុន បានមានប្រសាសន៍ថា កម្ពុជាត្រូវសិក្សារៀនសូត្រ និងត្រូវនាំយកបច្ចេកវិទ្យាទៅអនុវត្តបានគឺការគ្រប់គ្រងគុណភាពទឹកក្នុងស្រះចិញ្ចឹមត្រី ការប្រើប្រព័ន្ធកសិដ្ឋានវៃឆ្លាត និងការទាញយកថាមពលពន្លឺព្រះអាទិត្យមកប្រើ ដើម្បីកាត់បន្ថយថ្លៃដើមផលិតផងដែរ៕

អត្ថបទ៖ ធី ស្រីល័ក្ខ