នៅព្រឹកថ្ងៃសុក្រ ទី ១២ ខែធ្នូ ឆ្នាំ២០២៥ ព្រះមហាក្សត្រថៃ Maha Vajiralongkorn បានចេញព្រះរាជក្រឹត្យអនុម័តការរំលាយសភា ក្រោយពេលនាយករដ្ឋមន្ត្រីថៃ អានុទីន ឆាន់វីរៈគុល បានប្រកាសថា ខ្លួនសូមប្រគល់អំណាចជូនទៅប្រជាជនវិញ។

ការំលាយសភានេះ នឹងនាំឲ្យមានការរៀបចំបោះឆ្នោតជ្រើសរើសនាយករដ្ឋមន្ត្រីថ្មី ក្នុងរយៈពេល ៤៥-៦០ថ្ងៃខាងមុខ ខណៈបេក្ខភាពទាំង ៣ រូបខាងក្រោមនេះ កំពុងមានភាពលេចធ្លោរ និងទទួលបានប្រជាប្រិយភាពខ្លាំងពីសំណាក់ប្រជាជនថៃ៖

១/. លោក ណាត់ថាផុង រឿងបញ្ញាវុធ (Natthaphong Ruengpanyawut)៖ គឺជាតួអង្គនយោបាយដ៏លេចធ្លោបំផុតមួយនៅក្នុងនយោបាយថៃបច្ចុប្បន្ន ដោយសារលោកជាមេដឹកនាំគណបក្សប្រជាជន (People's Party) ដែលជាគណបក្សបន្តវេនពីគណបក្សឆ្ពោះទៅមុខ (Move Forward Party - MFP) ដែលត្រូវបានរំលាយ។ លោកក៏កំពុងកាន់តំណែងជាមេដឹកនាំបក្សប្រឆាំងនៅក្នុងសភាតំណាងរាស្ត្រផងដែរ។

២/. លោក ជ័យកសិម នីតិសិរី (Chaikasem Nitisiri)៖ គឺជាឥស្សរជននយោបាយជើងចាស់មួយរូបនៅក្នុងប្រទេសថៃ ដែលត្រូវបានគេស្គាល់ជាទូទៅថាជាបេក្ខជនជំនួសដ៏រឹងមាំរបស់គណបក្ស ដើម្បីថៃ (Pheu Thai Party)។ លោកមានប្រវត្តិដ៏រឹងមាំ និងចាក់ជ្រៅនៅក្នុងប្រព័ន្ធច្បាប់ថៃ ដែលធ្វើឱ្យលោកមានការគោរព និងទទួលស្គាល់ពីស្ថាប័នរដ្ឋបាលផ្សេងៗ។

៣/. លោក អានុទីន ឆាន់វីរៈគុល (Anutin Charnvirakul)៖ គឺជាអតីតនាយករដ្ឋមន្ត្រីបណ្តោះអាសន្ន និងជាតួអង្គនយោបាយដ៏មានឥទ្ធិពលបំផុតមួយរូបនៅប្រទេសថៃបច្ចុប្បន្ន។ ក្នុងនាមជាមេដឹកនាំគណបក្ស ភូមិចិត្តថៃ (Bhumjaithai Party) លោកត្រូវបានគេរំពឹងថានឹងក្លាយជា បេក្ខជននាយករដ្ឋមន្ត្រី របស់គណបក្សលោកជាថ្មីម្តងទៀតសម្រាប់ការបោះឆ្នោតជាតិដែលនឹងប្រព្រឹត្តទៅនៅដើមឆ្នាំ ២០២៦ ខាងមុខនេះ។

យ៉ាងណាមិញ ការបោះឆ្នោតនៅក្នុងរយៈពេលប៉ុន្មានថ្ងៃខាងមុខ នឹងក្លាយជាការប្រកួតប្រជែងរវាង ឆន្ទៈមហាជន និង អំណាចចរចា។ នាយករដ្ឋមន្ត្រីបន្ទាប់នឹងជាបុគ្គលដែលមិនត្រឹមតែឈ្នះសំឡេងឆ្នោតប៉ុណ្ណោះទេ ប៉ុន្តែថែមទាំងមានសមត្ថភាពបង្កើតសម្ព័ន្ធភាពចម្រុះ និងទទួលបានការយល់ព្រមពីកម្លាំងនយោបាយដែលមានឥទ្ធិពលគ្រប់ទិសទីផងដែរ៕