កាលពីថ្មីៗនេះ អគ្គស្នងការដ្ឋាននគរបាលជាតិ បានប្រកាសថា ចាប់ពីថ្ងៃទី០១ ខែមករា ឆ្នាំ២០២៥ នេះតទៅ ប្រសិនជាអង្គភាពនគរបាលចរាចរណ៍ផ្លូវគោកនៅតាមបណ្តារាជធានី ខេត្ត នឹងអនុវត្តចំពោះអ្នកមានបណ្ណបើកបរយានយន្តគ្រប់ប្រភេទដែលអស់ពិន្ទុ ឬសូន្យពិន្ទុ និងដកហូតប័ណ្ណបើកបរតែម្តង។

សម្រាប់មូលហេតុដែល អគ្គស្នងការដ្ឋាននគរបាលជាតិ ធ្វើបែបនេះ គឺដើម្បីបង្កើនប្រសិទ្ធភាពនៃការរឹតបន្តឹងការអនុវត្តច្បាប់ស្តីពីចរាចរណ៍ផ្លូវគោក សំដៅកាត់បន្ថយគ្រោះថ្នាក់ចរាចរណ៍ផ្លូវគោកឱ្យបានជាអតិបរមា និងបង្កលក្ខណៈងាយស្រួលក្នុងការអនុវត្តច្បាប់ផងដែរ។

គូសបញ្ជាក់ថា អគ្គស្នងការដ្ឋាននគរបាលជាតិ ក៏បានសំណូមពរទៅដល់ប្រជាពលរដ្ឋដែលមានបណ្ណបើកបរយានយន្តគ្រប់ប្រភេទជិតអស់ពិន្ទុ សូមទៅដាក់ពាក្យសុំរៀនបំប៉នដើម្បីប្រឡងយកពិន្ទុបន្ថែម ឬបំពេញពិន្ទុឡើងវិញ នៅមណ្ឌលផ្តល់សេវារបស់ក្រសួងសាធារណការ និងដឹកជញ្ជូន៕