នៅថ្ងៃទី២៥ ខែកញ្ញានេះ ប្រធានាធិបតីសហរដ្ឋអាមេរិក លោក ដូណាល់ ត្រាំ បានប្រកាសបន្ថែមពន្ធគយថ្មីលើផលិតផលនាំចូលសំខាន់ៗចំនួនមួយ ពីគ្រប់បណ្តាប្រទេសទាំងអស់ ខណៈនឹងត្រូវអនុវត្តន៍ចាប់ពីថ្ងៃទី០១ ខែតុលា ឆ្នាំ២០២៥តទៅ។ នេះបើយោងតាមការឲ្យដឹងពីទីភ្នាក់ងារសារព័ត៌មាន Business Insider។

ផលិតផលសំខាន់ៗទាំងនោះរួមមាន៖

១/. ផលិតផល​ឱសថ​ដែល​មាន​ម៉ាក​សញ្ញា​ ឬ​ប៉ាតង់​(Patent)ណាមួយ នឹងត្រូវយកពន្ធគយចំនួន ១០០% ​លើកលែងតែ​ក្រុមហ៊ុន​ដែល​កំពុង​សាងសង់​រោងចក្រ​ផលិត​ឱសថ​របស់​ខ្លួន​នៅ​អាមេរិក​។

២/. រថយន្តធុនធ្ងន់ (រថយន្តធំៗ)ទាំងអស់ដែលផលិតនៅតាមបណ្តាប្រទេសផ្សេងទៀតនៃពិភពលោក នឹងត្រូវយកពន្ធគយចំនួន ២៥%។ ការណ៍ធ្វើដូច្នេះដើម្បីគាំទ្រដល់ក្រុមហ៊ុនផលិតរបស់អាមេរិក ដូចជា Peterbilt, Kenworth, Freightliner, Mack Trucks និងផ្សេងៗទៀត។

៣/. គ្រឿងសង្ហារឹម និងទំនិញក្នុងផ្ទះ នឹងត្រូវយកពន្ធគយចន្លោះពី ៣០% ទៅ ៥០% តាមប្រភេទមុខទំនិញ។ ក្នុងនោះមានដូចជា គ្រឿងសង្ហារឹមបន្ទប់ទទួលភ្ញៀវ, គ្រឿងសង្ហារឹមបន្ទប់គេង និងគ្រឿងសង្ហារឹមផ្ទះបាយជាដើម ខណៈគ្រឿងសង្ហារឹមទាំងនោះស្ទើរគ្រប់ប្រភេទសុទ្ធសឹងតែនាំចូលពីអាស៊ី និងអឺរ៉ុប។

គួរជម្រាបផងដែរថា ក្នុងនយោបាយពាណិជ្ជកម្មរបស់លោក Donald Trump ដែលបានចាប់ផ្តើមអនុវត្តឡើងវិញនៅឆ្នាំ ២០២៥ ក្រោមគោលការណ៍ “តម្លៃសមរម្យ និងស្មើគ្នា” (Reciprocal Tariff Policy) ក្នុងគោលបំណងដើម្បីគាំទ្រ និងការពារផលិតផលក្នុងស្រុក ខណៈប្រទេសជាច្រើននៅអាស៊ីអាគ្នេយ៍ត្រូវបានប៉ះពាល់ដោយអត្រាពន្ធនាំចូលថ្មីទៅសហរដ្ឋអាមេរិក៕